കോട്ടയം : ഫൊക്കാന കേരള കൺവൻഷൻ 2025 കുമരകം ഗോകുലം ഗ്രാൻഡ് ഫൈവ് സ്റ്റാർ റിസോർട്ടിലെ ഡോ. എം. അനിരുദ്ധൻ നഗറിൽ ഇന്ന് തിരിതെളിയും. ഫൊക്കാന സ്ഥാപക പ്രസിഡന്റായ ഡോ. എം. അനിരുദ്ധന്റെ സ്മരണ നിലനിർത്തുന്നതിനായി കൺവൻഷൻ നഗരിക്ക് ഡോ. എം. അനിരുദ്ധൻ നഗർ എന്ന് പേരിട്ടിരിക്കുന്നു.
യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യൻ പ്രത്യേക ക്ഷണിതാവായി പങ്കെടുക്കും. ഇന്ന് മുതൽ മൂന്നാം തീയതി വരെയാണ് കൺവൻഷൻ ക്രമീകരിച്ചിരിക്കുന്നത്. ഒരുക്കങ്ങൾ അന്തിമഘട്ടത്തിലാണെന്ന് ഫൊക്കാന പ്രസിഡന്റ് സജിമോൻ ആന്റണി, സെക്രട്ടറി ശ്രീകുമാർ ഉണ്ണിത്താൻ എന്നിവർ അറിയിച്ചു.
ഇന്ന് ഡെലിഗേറ്റ്സ് റജിസ്‌ട്രേഷനോടുകൂടി കൺവൻഷൻ ആരംഭിക്കും. വൈകിട്ട് 4.30ന് ശിങ്കാരിമേളത്തിന്റെ അകമ്പടിയോടെ ഘോഷയാത്രയും തുടർന്ന് ഡോ. എം. അനിരുദ്ധന് ആദരാഞ്ജലികൾ അർപ്പിച്ച ശേഷം ലഹരിക്കെതിരെയുള്ള വിളംബരത്തോട്കൂടി ഉദ്ഘാടന സമ്മേളനവും നടക്കും.
സജിമോൻ ആന്റണി അധ്യക്ഷത വഹിക്കുന്ന യോഗത്തിൽ മുഖ്യമന്ത്രി പിണറായി വിജയൻ കൺവൻഷൻ ഉദ്ഘാടനം ചെയ്യും. പ്രതിപക്ഷ നേതാവ് വി.ഡി. സതീശൻ, മന്ത്രിമാരായ കെ.എൻ. ബാലഗോപാൽ, വി.എൻ. വാസവൻ, കെ. രാജൻ, റോഷി അഗസ്റ്റിൻ, എംപിമാരായ കെ.സി. വേണുഗോപാൽ, ജോസ് കെ. മാണി, ഫ്രാൻസിസ് ജോർജ്, എംഎൽഎമാരായ രമേശ് ചെന്നിത്തല, റോജി ജോൺ, തിരുവഞ്ചൂർ രാധാകൃഷ്ണൻ, അടൂർ ഗോപാലകൃഷ്ണൻ, മജീഷ്യൻ ഗോപിനാഥ് മുതുകാട്, മജീഷ്യൻ സാമ്രാജ്, കെ.വി. മോഹൻകുമാർ ഐഎഎസ്, മലയാള മനോരമ എഡിറ്റോറിയൽ ഡയറക്ടർ ജോസ് പനച്ചിപ്പുറം, റവ. ഫാ. ഡേവിസ് ചിറമ്മൽ തുടങ്ങിയവർ പങ്കെടുക്കും. ഭാരത ശ്രേഷ്ഠ പുരസ്കാരം സംവിധായകൻ അടൂർ ഗോപാലകൃഷ്ണന് സമ്മാനിക്കും.
സാഹിത്യം, സംസ്കാരം, ബിസിനസ് ഉൾപ്പെടെ വിവിധ രംഗങ്ങളിൽ മികച്ച സംഭാവനകൾ നൽകിയവരെ പുരസ്കാരം നൽകി ആദരിക്കും. നാളെ രാവിലെ 9.30 മുതൽ 11 വരെ ശബരി ഹാളിൽ സാഹിത്യ സെമിനാറും 11 മുതൽ 12.30 വരെ ബിസിനസ് സെമിനാറും ഫൊക്കാനയും കേരള യൂണിവേഴ്സിറ്റിയുമായി സഹകരിച്ചു നടത്തുന്ന ഭാഷയ്ക്കൊരു ഡോളർ സെഗ്‌മെന്റും (1 മുതൽ 2 വരെ), വിമൻസ് ഫോറം സെമിനാറും സ്കോളർഷിപ്പ് വിതരണവും (2 മുതൽ 3.30 വരെ), 3.30 മുതൽ 4.45 വരെ മീഡിയ സെമിനാറും നടക്കും.
അബി ഹാളിൽ ഫൊക്കാനയുമായി സഹകരിച്ചു നടത്തുന്ന ലൈഫ് ആൻഡ് ലിമ്പ് ചാരിറ്റബിൾ സൊസൈറ്റിയുടെ കാൽ വിതരണം, സ്വിമ്മിങ് പൂൾ ഏരിയയിൽ മൈൽസ്റ്റോൺ ചാരിറ്റബിൾ സൊസൈറ്റിയുമായി സഹകരിച്ചു നടത്തുന്ന ഫൊക്കാന സ്വിം കേരള സ്വിം പ്രൊജക്റ്റിന്റെ സമാപനം, ഫൊക്കാന ഹൗസിങ് പ്രൊജക്റ്റ്, മെഡിക്കൽ കാർഡ് വിതരണം, പ്രിവിലേജ് കാർഡ് വിതരണം തുടങ്ങിയവയും നാളെ നടക്കും.
5.30 മുതൽ 7.30 വരെ വാലെഡിക്ടോറിയൻ സെറിമണിയും 7.30 മുതൽ സാംസ്കാരിക പരിപാടികളും അരങ്ങേറും. അന്ന് രാവിലെ മുതൽ കേരളത്തിലെ മികച്ച കാർട്ടൂണിസ്റ്റുകളുടെ ലൈവ് കാരിക്കേച്ചറിങ് ഉണ്ടായിരിക്കും. മൂന്ന് ദിവസങ്ങളിലുമുള്ള സാംസ്കാരിക പരിപാടികൾക്ക് ചലചിത്ര നടിയും നർത്തകിയുമായ സരയൂ മോഹൻ നേതൃത്വം നൽകും. ഡാൻസറും അവതാരികയും കൂടിയായ അമല റോസ് കുര്യന്റെ നേതൃത്വത്തിലുള്ള ഡാൻസുകൾ, ഗായകരായ ജോബി, അഭിജിത് കൊല്ലം, ബേബി മിയ തുടങ്ങിയവർ അവതരിപ്പിക്കുന്ന വിവിധ കലാപരിപാടികളും ആസ്വദിക്കാം.
സമാപന ദിവസമായ ഓഗസ്റ്റ് മൂന്നിന് കുമരകത്തിന്റെ പ്രകൃതി സൗന്ദര്യം ആസ്വദിക്കുന്ന ഹൗസ്ബോട്ട് റൈഡ് ആണ് ക്രമീകരിച്ചിരിക്കുന്നത്. 400ൽ അധികം പേർക്ക് ഒരേസമയം സഞ്ചരിക്കാനും ഭക്ഷണപാനീയങ്ങൾ കഴിക്കാനുമുള്ള സൗകര്യവും ബോട്ടിനുണ്ട്. ബോട്ടിന്റെ സുരക്ഷാ മാനദണ്ഡങ്ങളെല്ലാം വിലയിരുത്തിയെന്നും അതെല്ലാം കുറ്റമറ്റതാണെന്ന് ബോധ്യപ്പെട്ടതായും ഫൊക്കാന പ്രസിഡന്റ് സജിമോൻ ആന്റണി പറഞ്ഞു. പ്രമുഖ മിമിക്രി കലാകാരനും ഗായകനുമായ രാജേഷ് അടിമാലിയുടെ കലാ പ്രകടനം ബോട്ട് യാത്രയ്ക്ക് കൊഴുപ്പേകും.
പ്രസിഡന്റ് സജിമോൻ ആന്റണി, സെക്രട്ടറി ശ്രീകുമാർ ഉണ്ണിത്താൻ, ട്രഷറർ ജോയി ചാക്കപ്പൻ, എക്സിക്യൂട്ടീവ് വൈസ് പ്രസിഡന്റ് പ്രവീൺ തോമസ്, വൈസ് പ്രസിഡന്റ് വിപിൻ രാജു, ജോയിന്റ് സെക്രട്ടറി മനോജ് ഇടമന, ജോയിന്റ് ട്രഷറർ ജോൺ കല്ലോലിക്കൽ, അഡീഷനൽ ജോയിന്റ് സെക്രട്ടറി അപ്പുകുട്ടൻ പിള്ള, അഡീഷനൽ ജോയിന്റ് ട്രഷറർ മില്ലി ഫിലിപ്പ്, വിമൻസ് ഫോറം ചെയർപഴ്സൺ രേവതി പിള്ള, ട്രസ്റ്റി ബോർഡ് ചെയർ ജോജി തോമസ്, കേരള കൺവൻഷൻ ചെയർമാൻ ജോയി ഇട്ടൻ, കേരള കൺവൻഷൻ കോ-ഓർഡിനേറ്റർ ഡോ. ലൂക്കോസ് മണ്ണയോട്ട്, സ്ഥാപക നേതാവ് തോമസ് തോമസ്, മറ്റ് കമ്മിറ്റി അംഗങ്ങൾ തുടങ്ങിയവർ നേതൃത്വം നൽകും.
