ലോകം കാത്തിരുന്ന നിമിഷം: ഗാസ സമാധാന ഉടമ്പടിയിൽ ഒപ്പുവെച്ച് യുദ്ധത്തിന് വിരാമം; ട്രംപിന്റെ ശ്രമങ്ങൾക്ക് മോദിയുടെ പിന്തുണ

ഇസ്രയേലും പലസ്തീനിലെ ഹമാസും തമ്മിലുള്ള ദീർഘകാല യുദ്ധത്തിന് അവസാനമായി, ഗാസ സമാധാന ഉടമ്പടി നിലവിൽ വന്നു. ലോകനേതാക്കളുടെ നേതൃത്വത്തിൽ രൂപം നേടിയ ഈ ചരിത്രപരമായ കരാറിൽ അമേരിക്കൻ പ്രസിഡന്റ് ഡോണൾഡ് ട്രംപ് അടക്കം നിരവധി നേതാക്കൾ ഒപ്പുവെച്ചു. ഇസ്രയേലിൽ തടവിലുണ്ടായിരുന്ന മുഴുവൻ ബന്ദികളെയും ഹമാസ് മോചിപ്പിച്ചതിന് പിന്നാലെയായിരുന്നു ഈ ധാരണാപത്രം പ്രാബല്യത്തിൽ വന്നത്.

രണ്ട് വർഷത്തിലേറെ നീണ്ടുനിന്ന തടവിനുശേഷം, ഹമാസിന്റെ കസ്റ്റഡിയിലുണ്ടായിരുന്ന 20 ഇസ്രയേലി ബന്ദികളെയാണ് മോചിപ്പിച്ചത്. ഇവരെ ഇസ്രയേലി സൈന്യം ഏറ്റുവാങ്ങി ആശുപത്രിയിലേക്ക് മാറ്റി കുടുംബങ്ങളുമായി ഒത്തുചേരാൻ സൗകര്യമൊരുക്കി. ഇതിന് മറുപടിയായി ഇസ്രയേൽ 1,900-ൽ അധികം പലസ്തീൻ തടവുകാരെ വിട്ടയച്ചു.

ഈജിപ്തിലെ ഷാം എൽ ഷെയ്ഖിൽ നടന്ന ഉച്ചകോടിയിലാണ് സമാധാന ഉടമ്പടി ഒപ്പുവെച്ചത്. യുഎസ് പ്രസിഡന്റ് ഡോണൾഡ് ട്രംപ്, ഈജിപ്ത് പ്രസിഡന്റ് അബ്ദുൽ ഫത്താഹ് അൽ-സിസി, തുർക്കി പ്രസിഡന്റ് റജബ് ത്വയ്യിബ് എർദോഗൻ, ഖത്തർ അമീർ തമീം ബിൻ ഹമദ് അൽ താനി എന്നിവർ കരാറിന് ഉറപ്പ് നൽകുന്നവരായി ഒപ്പുവെച്ചു. 30-ലധികം രാജ്യങ്ങളുടെ നേതാക്കൾ ഉച്ചകോടിയിൽ പങ്കെടുത്തു.

ഗാസയുടെ ഭാവിക്ക് അടിത്തറയാകുന്ന സമാധാന ഉടമ്പടി മേഖലയിലാകെ ശാശ്വത സമാധാനം കൊണ്ടുവരുമെന്നും ട്രംപ് പ്രസ്താവിച്ചു. ഇസ്രയേലിന്റെ സുരക്ഷ ഉറപ്പുവരുത്തിക്കൊണ്ട് ഗാസയുടെ പുനർനിർമാണത്തിനും ഭരണം പലസ്തീൻ അതോറിറ്റിക്ക് കൈമാറുന്നതിനുമുള്ള വ്യവസ്ഥകൾ ഉൾപ്പെടുത്തിയ 20 ഇനങ്ങളുള്ള സമാധാന പദ്ധതിയാണ് അംഗീകൃതമായത്.

ഗാസയിലെ സമാധാനശ്രമങ്ങൾക്ക് ഇന്ത്യയുടെ പൂർണ്ണ പിന്തുണയുണ്ടെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. ബന്ദികളുടെ മോചനം അവരുടെ കുടുംബങ്ങളുടെ ധൈര്യത്തിന്റെയും പ്രസിഡന്റ് ട്രംപിന്റെ അചഞ്ചലമായ സമാധാനശ്രമങ്ങളുടെയും പ്രധാനമന്ത്രി നെതന്യാഹുവിന്റെ ദൃഢനിശ്ചയത്തിന്റെയും പ്രതിഫലനമാണെന്ന് മോദി എക്സ് പ്ലാറ്റ്‌ഫോമിലൂടെ പ്രതികരിച്ചു. മേഖലയിൽ സമാധാനം കൊണ്ടുവരാനുള്ള ട്രംപിന്റെ ആത്മാർഥമായ ശ്രമങ്ങൾക്ക് ഇന്ത്യ പിന്തുണ നൽകുമെന്നും മോദി കൂട്ടിച്ചേർത്തു.

ഉച്ചകോടിയിൽ ഇന്ത്യയുടെ പ്രതിനിധിയായി വിദേശകാര്യ സഹമന്ത്രി കീർത്തി വർധൻ സിങ് പങ്കെടുത്തു.