വാഷിങ്ടൺ : ലോകമെമ്പാടുമുള്ള വിമാന യാത്രക്കാർക്ക് വെല്ലുവിളികൾ നിറഞ്ഞ ആഴ്ച. അമേരിക്കയിൽ താങ്ക്സ്ഗിവിങ് അവധിക്കാലത്തെ ഇതുവരെയുള്ളതിലെ ഏറ്റവും വലിയ യാത്രാ തിരക്കിനെയും മോശം കാലാവസ്ഥയെയും ഒരേസമയം നേരിടുമ്പോൾ, ഇന്ത്യയുൾപ്പെടെ ഏഷ്യൻ രാജ്യങ്ങൾ അഗ്നിപർവത സ്ഫോടനത്തിൽ നിന്നുള്ള ചാരപ്പുക കാരണം വ്യോമഗതാഗത പ്രതിസന്ധിയിലാണ്.
അമേരിക്കൻ ഓട്ടോമൊബൈൽ അസോസിയേഷൻ റിപ്പോർട്ട് ചെയ്യുന്നതനുസരിച്ച്, ഈ വർഷം 8.2 കോടി പേർ കുടുംബാംഗങ്ങളെ സന്ദർശിക്കാനായി യാത്ര ചെയ്യുന്ന ഏറ്റവും തിരക്കേറിയ താങ്ക്സ്ഗിവിങ് സീസണാണ്. എന്നാൽ വടക്കുകിഴക്കും മിഡ്വെസ്റ്റും ഉൾപ്പെടെ നിരവധി പ്രദേശങ്ങളിൽ കനത്ത മഞ്ഞുവീഴ്ചയും മഴയും വിമാന സർവീസുകളെ ബാധിച്ചു. ന്യൂയോർക്ക്, ഷിക്കാഗോ അടക്കമുള്ള പ്രധാന വിമാനത്താവളങ്ങളിൽ വിമാനങ്ങൾ വൈകുകയോ റദ്ദാക്കുകയോ ചെയ്യാനുള്ള സാധ്യത ഉയർന്നിരിക്കുകയാണ്. റോഡ് യാത്രക്കാരെയും അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.
അമേരിക്കയിൽ കാലാവസ്ഥയാണ് പ്രധാന വെല്ലുവിളിയായപ്പോൾ, ഇന്ത്യയിൽ പ്രശ്നം സൃഷ്ടിച്ചത് ഇത്യോപ്യയിൽ നടന്ന ഹെയ്ലി ഗുബ്ബി അഗ്നിപർവത സ്ഫോടനമാണ്. സ്ഫോടനത്തിൽ നിന്നുണ്ടായ ചാരപ്പുക അറബിക്കടൽ കടന്ന് ഇന്ത്യയുടെ പടിഞ്ഞാറൻ മേഖലയിലേക്കെത്തി. ഗുജറാത്ത്, രാജസ്ഥാൻ, മഹാരാഷ്ട്ര എന്നീ സംസ്ഥാനങ്ങളുടെ വ്യോമപാതകളിൽ ചാരപ്പുക കണ്ടെത്തിയതിനെ തുടർന്ന് വിമാന സർവീസുകൾക്ക് അപകടസാധ്യത ഉയർന്നു.
അഗ്നിപർവത ചാരത്തിലുള്ള സൂക്ഷ്മ ഗ്ലാസ് കണങ്ങൾ വിമാന എൻജിനുകൾക്ക് വലിയ കേടുപാടുകൾ വരുത്താൻ സാധ്യതയുള്ളതിനാൽ വ്യോമയാന മന്ത്രാലയം അതീവ ജാഗ്രത നിർദ്ദേശിച്ചു. മുൻകരുതലിന്റെ ഭാഗമായി ഇൻഡിഗോ, എയർ ഇന്ത്യ ഉൾപ്പെടെ നിരവധി വിമാനക്കമ്പനികൾ സർവീസുകൾ റദ്ദാക്കുകയോ വഴിതിരിച്ചുവിടുകയോ ചെയ്തു. മുംബൈ, അഹമ്മദാബാദ് എന്നിവിടങ്ങളിലെ സർവീസുകളാണ് പ്രധാനമായും ബാധിച്ചത്.
യാത്രക്കാർ വിമാനക്കമ്പനികളുമായി ബന്ധപ്പെട്ടു അവരുടെ യാത്രയുടെ നിലവിവരം ഉറപ്പുവരുത്തണമെന്ന് അധികൃതർ ആവശ്യപ്പെട്ടു.
