എച്ച്-1ബി വിസ അഭിമുഖങ്ങളിൽ പുതിയ ചോദ്യം; ഇന്ത്യൻ ഐടി പ്രൊഫഷണലുകൾക്ക് ആശങ്ക വർധിക്കുന്നു
വാഷിംഗ്ടൺ: എച്ച്-1ബി വിസ അഭിമുഖങ്ങളിൽ യുഎസ് ഇമിഗ്രേഷൻ അധികൃതർ ഉയർത്തുന്ന പുതിയ ചോദ്യം ഇന്ത്യൻ ഐടി പ്രൊഫഷണലുകൾക്കിടയിൽ ആശങ്ക സൃഷ്ടിക്കുന്നു. “ഈ ജോലി ഒരു അമേരിക്കൻ പൗരന് ചെയ്യാൻ കഴിയാത്തത് എന്തുകൊണ്ട്?” എന്ന ചോദ്യമാണ് സമീപകാലത്ത് അഭിമുഖങ്ങളിൽ വ്യാപകമായി ചോദിക്കപ്പെടുന്നതെന്നാണ് റിപ്പോർട്ടുകൾ. മുൻകൂട്ടി തയ്യാറെടുപ്പില്ലാതെ അഭിമുഖത്തിനെത്തുന്ന നിരവധി അപേക്ഷകർക്ക് ഈ ചോദ്യത്തിന് വ്യക്തമായ മറുപടി നൽകാൻ കഴിയുന്നില്ലെന്നാണ് വിലയിരുത്തൽ.
അമേരിക്കൻ തൊഴിലവസരങ്ങളിൽ സ്വദേശികൾക്ക് മുൻഗണന ഉറപ്പാക്കുകയെന്ന ലക്ഷ്യത്തോടെയാണ് വിസ നടപടികൾ കൂടുതൽ കർശനമാക്കുന്നതെന്ന് വിദഗ്ധർ ചൂണ്ടിക്കാട്ടുന്നു. മുൻ പ്രസിഡന്റ് ഡോണൾഡ് ട്രംപ് നടപ്പാക്കിയ “Buy American, Hire American” നയത്തിന്റെ തുടർച്ചയായാണ് പുതിയ സമീപനത്തെ ഇമിഗ്രേഷൻ നിയമ വിദഗ്ധർ വിലയിരുത്തുന്നത്.
ഇന്ത്യൻ-അമേരിക്കൻ സമൂഹത്തെയും യുഎസ് കുടിയേറ്റ വിഷയങ്ങളെയും പിന്തുടരുന്ന ദി അമേരിക്കൻ ബസാർ പുറത്തുവിട്ട റിപ്പോർട്ടിലാണ് ഇക്കാര്യം വ്യക്തമാക്കുന്നത്. സാങ്കേതികവിദ്യ, ഐടി കൺസൾട്ടിംഗ്, കരാർ ജോലികൾ തുടങ്ങിയ മേഖലകളിലെ എച്ച്-1ബി, എൽ-1ബി അപേക്ഷകരാണ് കൂടുതൽ പരിശോധന നേരിടുന്നതെന്നും റിപ്പോർട്ടിൽ പറയുന്നു.
എച്ച്-1ബി വിസ കൈവശമുള്ളവരിൽ വലിയൊരു വിഭാഗം ഇന്ത്യയിലും ചൈനയിലും നിന്നുള്ളവരായതിനാൽ പുതിയ നടപടികൾ ഏറ്റവും കൂടുതൽ ബാധിക്കുന്നത് ഇന്ത്യൻ ഐടി മേഖലയെയാണെന്നാണ് വിലയിരുത്തൽ. വിസ അനുവദിക്കുന്നതിൽ കാലതാമസവും അപേക്ഷകൾ നിരസിക്കുന്ന സംഭവങ്ങളും വർധിച്ചതായി ബിസിനസ് ഇമിഗ്രേഷൻ അഭിഭാഷകൻ ജെയിംസ് ഹോളിസ് വ്യക്തമാക്കി.
അപേക്ഷകർ വിദ്യാഭ്യാസ യോഗ്യത, സാങ്കേതിക വൈദഗ്ധ്യം, പ്രവൃത്തിപരിചയം എന്നിവ വിശദീകരിക്കാൻ തയ്യാറാകുന്നുണ്ടെങ്കിലും, ഒരു അമേരിക്കൻ തൊഴിലാളിക്ക് ചെയ്യാനാകാത്ത പ്രത്യേകത തങ്ങൾക്കുണ്ടെന്ന് തെളിയിക്കുന്നതിലാണ് പലരും ബുദ്ധിമുട്ടുന്നതെന്നും അദ്ദേഹം ചൂണ്ടിക്കാട്ടി. അടുത്ത മൂന്ന് വർഷവും ഇമിഗ്രേഷൻ നടപടികൾ കർശനമായി തുടരാൻ സാധ്യതയുണ്ടെന്നും അദ്ദേഹം വിലയിരുത്തി.
വിസ അഭിമുഖത്തിൽ വിജയസാധ്യത വർധിപ്പിക്കാൻ അപേക്ഷകർ ജോലിയുടെ പ്രത്യേകത വ്യക്തമായി അവതരിപ്പിക്കണമെന്നും വിദഗ്ധർ നിർദേശിക്കുന്നു. തങ്ങളുടെ പ്രത്യേക സാങ്കേതിക പരിജ്ഞാനം, വ്യവസായപരിചയം, വിപണിയെക്കുറിച്ചുള്ള അറിവ്, പ്രൊഫഷണൽ വൈദഗ്ധ്യം എന്നിവ വ്യക്തമായി വിശദീകരിക്കണം. സമർപ്പിക്കുന്ന രേഖകളിലെ വിവരങ്ങൾ കൃത്യമാണെന്ന് ഉറപ്പാക്കുകയും, ജോലി, ശമ്പളം, ചുമതലകൾ എന്നിവയെക്കുറിച്ച് വ്യക്തമായ ധാരണ പുലർത്തുകയും ചെയ്യുന്നത് നിർണായകമാണെന്നും അവർ നിർദേശിച്ചു.
