മുംബൈ ∙ ഉപഗ്രഹങ്ങളുടെ വഴി ഇന്ത്യയുടെ ദൂരദേശങ്ങളിലേക്ക് ലോകനിലവാരമുള്ള അതിവേഗ ഇന്റർനെറ്റ് സേവനം എത്തിക്കാൻ എയർടെൽ തയ്യാറാകുന്നു. ഇലോൺ മസ്കിന്റെ ഉടമസ്ഥതയിലുള്ള സ്പേസ് എക്‌സുമായി എയർടെൽ കരാർ ഒപ്പുവെച്ചതായി ഭാരതി എയർടെൽ ഓഹരിവിപണിയെ അറിയിച്ചതോടെ ഇന്ത്യയിലെ ഡിജിറ്റൽ രംഗത്ത് പുതിയൊരു അധ്യായം ആരംഭിക്കുന്നു.
സ്റ്റാർലിങ്ക് ഉപകരണങ്ങൾ എയർടെൽ റീട്ടെയിൽ സ്റ്റോറുകൾ വഴിയാകുമെന്ന് കമ്പനി വ്യക്തമാക്കിയിട്ടുണ്ട്. ബിസിനസ് സ്ഥാപനങ്ങൾക്കും സ്‌കൂളുകൾക്കും കമ്മ്യൂണിറ്റികൾക്കും ആരോഗ്യ കേന്ദ്രങ്ങൾക്കും പ്രത്യേകിച്ച് ഗ്രാമപ്രദേശങ്ങളിലെ ജനങ്ങൾക്കും ഈ സേവനം എത്തിക്കാനാണ് കരാറിന്റെ ലക്ഷ്യം.
അതേസമയം ഇന്ത്യയിൽ സ്റ്റാർലിങ്ക് സേവനങ്ങൾ ലഭ്യമാക്കുന്നതിന് സ്പേസ് എക്‌സിന് ഇപ്പോഴും നിയന്ത്രണ ഏജൻസികളിൽ നിന്നുള്ള അനുമതികൾ നേടേണ്ടിയിരിക്കുന്നു. 2022 ഒക്ടോബറിലാണ് ജിഎംപിസിഎസ് ലൈസൻസിനായി കമ്പനിയ് അപേക്ഷിച്ചത്. കരാർ ഒപ്പുവെച്ചതിന്റെ അടിസ്ഥാനത്തിൽ ഇനി കേന്ദ്രസർക്കാരിന്റെ ട്രയൽ സ്പെക്ട്രം അനുമതിയോടെ പ്രാരംഭ പ്രവർത്തനങ്ങൾ തുടങ്ങാനാകും.
രാജ്യത്തിന്റെ ഏതറ്റത്തെയും അതിവേഗ, വിശ്വാസയോഗ്യമായ ഇന്റർനെറ്റ് സേവനം നൽകുകയാണ് ഈ പദ്ധതിയുടെ പ്രധാന ഉദ്ദേശം എന്ന് എയർടെൽ എംഡിയും വൈസ് ചെയർമാനുമായ ഗോപാൽ വിറ്റൽ വ്യക്തമാക്കി.
ഇന്ത്യയിൽ സ്റ്റാർലിങ്ക് സേവനം തുടങ്ങാനുള്ള ഇലോൺ മസ്കിന്റെ ആഗ്രഹം കഴിഞ്ഞവർഷം വെളിപ്പെടുത്തിയിരുന്നു. തുടർന്ന് പ്രധാനമന്ത്രി നരേന്ദ്ര മോദിയുമായി നടത്തിയ കൂടിക്കാഴ്ചയിലാണ് ഇന്ത്യൻ വിപണിയിലെ പ്രവേശനത്തിന് ആവശ്യമായ ധാരണകൾ ഉണ്ടാകുന്നത്.
ഇന്ത്യൻ ഡിജിറ്റൽ മുന്നേറ്റത്തിനായി എയർടെലും സ്പേസ് എക്‌സും ചേർന്നെത്തുന്ന സഹകരണം വൻ മാറ്റങ്ങൾക്ക് വഴിയൊരുക്കുമെന്ന പ്രതീക്ഷയിലാണ് ഇന്ത്യയുടെ ടെലികോം രംഗം. എയർടെലിന്റെ പശ്ചാത്തല സൗകര്യങ്ങൾ സ്പേസ് എക്‌സിനും കൂടുതൽ കരുത്ത് പകരുമെന്ന് കമ്പനിയുടെ ഉറച്ച വിശ്വാസം.
