കടലക്ക് ഇത്രയേറെ ഗുണങ്ങളോ…..

​ രാവിലെ

രാവിലെ കറുത്ത കടല പുഴുങ്ങിക്കഴിയ്ക്കുന്നത് ആരോഗ്യകരമായ പ്രാതല്‍ ശീലങ്ങളില്‍ ഒന്നാണ്. കടല വെള്ളത്തിലിട്ട് കുതിര്‍ത്തി മുളപ്പിച്ചത് വേവിച്ച് രാവിലെ പ്രാതലിന് കഴിയ്ക്കുന്നത് ഏറെ ആരോഗ്യകരമാണ്. കറുത്ത കടല പല ആരോഗ്യ ഗുണങ്ങളുമുള്ളതാണ്. പ്രോട്ടീനുകളുടെ ഉറവിടമാണിത്. ഇത് കഴിയ്ക്കാന്‍ രാവിലെ പ്രാതല്‍ തന്നെയാണ് ഏറ്റവും ഉത്തമമായ സമയം.

​ പ്രമേഹത്തിന്

പ്രമേഹത്തിനുള്ള നല്ലൊരു പരിഹാരമാണ് കറുത്ത കടല.കറുത്ത കടലയിൽ അടങ്ങിയിരിക്കുന്ന സങ്കീർണ്ണമായ കാർബോഹൈഡ്രേറ്റ്, പ്രോട്ടീൻ, ഫൈബർ എന്നീ ഘടകങ്ങൾ ദഹന പ്രക്രിയയെ മന്ദഗതിയിലാക്കിക്കൊണ്ട് ശരീരത്തിലെ പഞ്ചസാരയുടെ ആഗിരണം നിയന്ത്രിച്ചു നിർത്താൻ സഹായിക്കുന്നു. നിങ്ങളുടെ ഭക്ഷണശീലത്തിൽ കുതിർത്തിയ കടല ചേർക്കുന്നത് പഞ്ചസാരയുടെ അളവ് കുറച്ചുകൊണ്ട് ടൈപ്പ് 2 പ്രമേഹ സാധ്യതയെ നിയന്ത്രിക്കുന്നതിന് സഹായിക്കും.

​ വിളര്‍ച്ചയ്ക്ക്

വിളര്‍ച്ചയ്ക്ക് പറ്റിയ മരുന്നാണ് കുതിര്‍ത്ത കടല വേവിച്ച് കഴിയ്ക്കുന്നത്. സസ്യാഹാരികളായ ആളുകൾക്ക് അയൺ പോഷകങ്ങളെ നൽകുന്ന ഏറ്റവും മികച്ച ഉറവിടമാണ് കുതിർത്ത കടല. ഇത് രക്തത്തിലെ ഹീമോഗ്ലോബിൻ്റെ അളവ് മെച്ചപ്പെടുത്താൻ സഹായിക്കും. വിളർച്ച ബാധിച്ച ആളുകൾക്ക് കഴിക്കാൻ ശുപാർശ ചെയ്യുന്ന ഒന്നാണിവ. ഗർഭിണികൾക്കും മുലയൂട്ടുന്ന അമ്മമാർക്കും ഏറ്റവും മികച്ചത് കൂടിയാണിവ.

ബിപി നിയന്ത്രണത്തിന്

ബിപി നിയന്ത്രണത്തിന് ഏറെ ആരോഗ്യകരമാണിത്. മഗ്നീഷ്യം, പൊട്ടാസ്യം തുടങ്ങിയ ധാതുക്കളുടെ മികച്ച ഉറവിടമാണ് കുതിർത്തിയ കടല. ഇത് ഉയർന്ന രക്തസമ്മർദ്ദത്തെ തടയാനും മോശം കൊളസ്ട്രോൾ നില കുറയ്ക്കാനും സഹായിക്കും, അതുകൊണ്ടുതന്നെ ഇത് ഹൃദയാരോഗ്യം വർദ്ധിപ്പിക്കും. കുതിർത്തിയ കടല പതിവായി കഴിക്കുന്നത് വീക്കം കുറയ്ക്കുന്ന ഫാറ്റി ആസിഡായ ബ്യൂട്ടൈറേറ്റിന്റെ ഉത്പാദനത്തെ പ്രോത്സാഹിപ്പിക്കുന്നു. ഇതിൽ അടങ്ങിയിരിക്കുന്ന ആന്റിഓക്‌സിഡന്റുകൾ വൻകുടൽ, സ്തന, ശ്വാസകോശ അർബുദം എന്നിവയുടെ സാധ്യതകളെ കുറയ്ക്കാൻ സഹായകമാണെന്ന് ഗവേഷണങ്ങൾ വ്യക്തമാക്കുന്നു.

കുതിർത്ത കടല

കുതിർത്ത കടലയിൽ കലോറി തീരെ കുറവാണ്. പകരം ഇതിൽ കൂടുതൽ പോഷകങ്ങളാണ് അടങ്ങിയിരിക്കുന്നത്. പ്രോട്ടീൻ, ഫൈബർ എന്നിവയുടെ മികച്ച ഉറവിടമായ ഇതിൽ കുറഞ്ഞ ഗ്ലൈസെമിക് സൂചികയാണുള്ളത്. ഇതിൽ ഉയർന്ന അളവിൽ അടങ്ങിയിരിക്കുന്ന നാരുകളുടെ സാന്നിധ്യം നിങ്ങളുടെ അമിതവിശപ്പിനെ തൃപ്തിപ്പെടുത്തുകയും ചെയ്യുന്നു. ഇത് അനാരോഗ്യകരമായ ലഘുഭക്ഷണങ്ങളിൽ നിന്ന് വിട്ടുനിൽക്കാനും അമിതമായി ഭക്ഷണം കഴിക്കുന്നതിനെ തടയാനും സഹായിക്കും.

കടല കുതിർത്തിയ രീതിയിൽ കഴിക്കുമ്പോൾ ഗുണങ്ങൾ ഇരട്ടിയാകുന്നു. മാത്രമല്ല അവ ദഹനത്തെ എളുപ്പമാകുകയും ചെയ്യുന്നു. കുറഞ്ഞത് എട്ട് മണിക്കൂറെങ്കിലും ഇവ തണുത്ത വെള്ളത്തിൽ മുക്കിവയ്ക്കുക. ചെറുചൂടുള്ള വെള്ളത്തിൽ കുതിർക്കുകയാണെങ്കിൽ, നാലോ അഞ്ചോ മണിക്കൂർ ചെയ്താൽ മതിയാവും. കുതിർത്ത കടല മുഴുവൻ ഒറ്റയടിക്ക് കഴിച്ചാൽ ഇത് നിങ്ങളുടെ വയറിനെ അസ്വസ്ഥമാക്കാൻ സാധ്യതയുണ്ട്. അതിനാൽ ഇടവേള എടുത്തുകൊണ്ട് ദിവസത്തിൽ ഉടനീളം കഴിക്കാൻ ആരംഭിക്കാം. നിങ്ങളുടെ ശരീരത്തിലെ പ്രോട്ടീൻ അളവ് മെച്ചപ്പെടുത്താനും മറ്റു പോഷകങ്ങൾ ഉറപ്പാക്കാനും കടല പതിവായി കഴിക്കുന്നതു വഴി സാധിക്കും