ഇറാൻ–ഇസ്രയേൽ സംഘർഷം രൂക്ഷം; ഹോർമുസ് കടലിടുക്കിൽ യുഎസ് നേവിയുടെ ട്രൈറ്റൺ ഡ്രോണുകൾ നിരീക്ഷണത്തിൽ.
പശ്ചിമേഷ്യയിൽ വീണ്ടും യുദ്ധഭീതി ശക്തമാകുന്നതിനിടെ ഇറാനിലെ തന്ത്രപ്രധാന കേന്ദ്രങ്ങളെ ലക്ഷ്യമാക്കി ഇസ്രയേൽ നടത്തിയ മിസൈൽ ആക്രമണം മേഖലയിൽ അതീവ ഗുരുതര സാഹചര്യം സൃഷ്ടിച്ചു. അമേരിക്കയുടെ പരോക്ഷ പിന്തുണയോടെയാണ് ഈ ‘മുൻകരുതൽ ആക്രമണം’ നടത്തിയതെന്നാണ് റിപ്പോർട്ടുകൾ. ഇറാന്റെ പ്രസിഡൻഷ്യൽ സമുച്ചയവും സുപ്രീം നേതാവ് Ayatollah Ali Khameneiയുടെ ഓഫീസിനോട് ചേർന്ന പ്രദേശങ്ങളും പ്രധാനമായും ലക്ഷ്യമിട്ടതായി സൂചനയുണ്ട്.
ഇസ്രയേലിലെ Channel 12 സുരക്ഷാ വൃത്തങ്ങളെ ഉദ്ധരിച്ച് പുറത്തുവിട്ട വിവരങ്ങൾ പ്രകാരം, അമേരിക്ക–ഇസ്രയേൽ സംയുക്ത സൈനിക നീക്കത്തിന്റെ ഭാഗമായാണ് ഈ ആക്രമണം നടന്നത്. ആക്രമണം ശക്തമായതോടെ ഖമേനിയെ സുരക്ഷിത കേന്ദ്രത്തിലേക്ക് മാറ്റിയതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.
ആക്രമണത്തിന് പിന്നാലെ United States Navy യുടെ അത്യാധുനിക നിരീക്ഷണ ഡ്രോണുകൾ ഹോർമുസ് കടലിടുക്കിലും ഗൾഫ് ഓഫ് ഒമാൻ മേഖലയിലും സജീവമായി. പ്രത്യേകിച്ച് MQ-4C Triton ഡ്രോണുകൾ ഇറാന്റെ ഭാഗത്തുനിന്നുള്ള പ്രത്യാക്രമണ സാധ്യതകൾ തത്സമയം നിരീക്ഷിക്കാൻ വിന്യസിച്ചിരിക്കുകയാണ്. ഉയർന്ന ശേഷിയുള്ള സെൻസറുകൾ ഉപയോഗിച്ച് മിസൈൽ ലോഞ്ചറുകൾ, നാവിക കപ്പലുകൾ തുടങ്ങിയ സൈനിക നീക്കങ്ങൾ നിരീക്ഷിച്ച് വിവരങ്ങൾ അമേരിക്കൻ കമാൻഡ് കേന്ദ്രങ്ങളിലേക്കും ഇസ്രയേൽ സൈനിക നേതൃത്വത്തിലേക്കും കൈമാറാൻ ഈ ഡ്രോണുകൾക്ക് കഴിയും. ആയുധങ്ങൾ വഹിക്കാത്തിരുന്നാലും യുദ്ധഭൂമിയിലെ നിർണായക വിവര ശേഖരണത്തിനായുള്ള ‘കണ്ണ്’ എന്ന നിലയിലാണ് ഇവ പ്രവർത്തിക്കുന്നത്.
ഇസ്രയേൽ അധികൃതർ ആക്രമണം ഇറാന്റെ ആണവവും ബാലിസ്റ്റിക് മിസൈൽ പദ്ധതികളുമെതിരെ സ്വീകരിച്ച മുൻകരുതൽ നടപടിയാണെന്ന് വ്യക്തമാക്കുന്നു. കഴിഞ്ഞ ജൂണിൽ നടന്ന 12 ദിവസത്തെ വ്യോമസംഘർഷത്തിന് ശേഷം ഇറാൻ ആണവ പദ്ധതികളുമായി മുന്നോട്ട് പോകുകയാണെങ്കിൽ വീണ്ടും കടുത്ത നടപടി സ്വീകരിക്കുമെന്ന് അമേരിക്കയും ഇസ്രയേലും മുന്നറിയിപ്പ് നൽകിയിരുന്നു. അതിനെ അവഗണിച്ച സാഹചര്യത്തിലാണ് ഇപ്പോഴത്തെ സൈനിക നീക്കമെന്ന വിലയിരുത്തലുകളും ഉയരുന്നു.
ഇതോടെ പശ്ചിമേഷ്യയിൽ വീണ്ടും വലിയ തോതിലുള്ള സംഘർഷ സാധ്യതകൾ ഉയർന്നിരിക്കുകയാണ്. ഹോർമുസ് കടലിടുക്ക് പോലുള്ള ആഗോള എണ്ണവ്യാപാരത്തിന് നിർണായകമായ മേഖലയിൽ സൈനിക സാന്നിധ്യം വർധിച്ചതോടെ അന്താരാഷ്ട്ര സമൂഹവും ആശങ്കയോടെ സ്ഥിതിഗതികൾ നിരീക്ഷിക്കുകയാണ്.
