ഇറാനിൽ ഇസ്രയേൽ–അമേരിക്ക സംയുക്താക്രമണം; ഖമനയി സുരക്ഷിത കേന്ദ്രത്തിലേക്ക്, തിരിച്ചടിക്ക് ഇറാൻ മുന്നറിയിപ്പ്.
ടെൽ അവീവ് : ഇറാനിൽ ഇസ്രയേലും അമേരിക്കയും ചേർന്ന് സംയുക്താക്രമണം നടത്തിയതായി ഇസ്രയേൽ പ്രതിരോധ മന്ത്രി ഇസ്രയേൽ കട്സ് അറിയിച്ചു. ആക്രമണത്തിന് പിന്നാലെ ഇസ്രയേലിൽ അടിയന്തരാവസ്ഥ പ്രഖ്യാപിച്ചു. ഇറാന്റെ തലസ്ഥാനമായ ടെഹ്റാൻ നഗരത്തിൽ ശക്തമായ സ്ഫോടന ശബ്ദം കേട്ടതായും വിവിധ ഭാഗങ്ങളിൽ പുക ഉയർന്നതായും രാജ്യാന്തര വാർത്താ ഏജൻസിയായ Associated Press റിപ്പോർട്ട് ചെയ്തു.
ഇറാൻ പരമോന്നത നേതാവ് ആയത്തുള്ള അലി ഖമനയിയുടെ ഓഫീസ് സമുച്ചയത്തിന് സമീപത്താണ് ആക്രമണം നടന്നതെന്നാണ് വിവരം. സംഭവത്തിന് പിന്നാലെ ഖമനയിയെ സുരക്ഷിത കേന്ദ്രത്തിലേക്ക് മാറ്റിയതായി റിപ്പോർട്ടുകൾ സൂചിപ്പിക്കുന്നു. നിലവിൽ അദ്ദേഹം ടെഹ്റാനിൽ ഇല്ലെന്നും Reuters റിപ്പോർട്ട് ചെയ്യുന്നു. സ്ഫോടനത്തിന്റെ വ്യാപ്തിയെയും നാശനഷ്ടങ്ങളെയും കുറിച്ചുള്ള കൂടുതൽ വിവരങ്ങൾ പുറത്തുവന്നിട്ടില്ല.
അതേസമയം, ഇസ്രയേലിന്റെ വിവിധ പ്രദേശങ്ങളിൽ മുന്നറിയിപ്പ് സൈറൺ മുഴക്കിയതായി സൈന്യം അറിയിച്ചു. സുരക്ഷാ മുൻകരുതലുകളുടെ ഭാഗമായാണ് നടപടി സ്വീകരിച്ചതെന്ന് അധികൃതർ വ്യക്തമാക്കി. ആക്രമണത്തിന് ശക്തമായ തിരിച്ചടി നൽകുമെന്ന് ഇറാൻ മുന്നറിയിപ്പ് നൽകിയതോടെ പശ്ചിമേഷ്യയിലെ സാഹചര്യം അതീവ സംഘർഷഭരിതമായി തുടരുകയാണ്.
