മിഡിൽ ഈസ്റ്റ് സംഘർഷം: 32,000 അമേരിക്കക്കാർ നാട്ടിലേക്ക് സുരക്ഷിതമായി മടങ്ങി.
ന്യൂയോർക്ക് : മിഡിൽ ഈസ്റ്റിലെ സംഘർഷഭരിതമായ സാഹചര്യങ്ങളിൽ കുടുങ്ങിയിരുന്ന അമേരിക്കൻ പൗരന്മാരെ സുരക്ഷിതമായി നാട്ടിലേക്ക് തിരിച്ചെത്തിക്കുന്ന രക്ഷാദൗത്യം വൻ വിജയം കൈവരിച്ചതായി അമേരിക്കൻ സ്റ്റേറ്റ് ഡിപ്പാർട്ട്മെന്റിലെ അസിസ്റ്റന്റ് സെക്രട്ടറി ഡിലൻ ജോൺസൺ അറിയിച്ചു. ഫെബ്രുവരി 28 മുതൽ ആരംഭിച്ച അടിയന്തര ഒഴിപ്പിക്കൽ നടപടികളിലൂടെ ഇതിനോടകം 32,000ത്തിലധികം അമേരിക്കൻ പൗരന്മാർ യുഎസിലേക്ക് സുരക്ഷിതമായി മടങ്ങിയെത്തിയതായി അദ്ദേഹം വ്യക്തമാക്കി. സുരക്ഷിതമായി മറ്റ് രാജ്യങ്ങളിലേക്ക് താൽക്കാലികമായി മാറിയവരെയും ഇപ്പോഴും യാത്രാമധ്യേയുള്ളവരെയും ഉൾപ്പെടുത്തിയാൽ ഈ സംഖ്യ ഇനിയും ഉയരുമെന്നും അദ്ദേഹം പറഞ്ഞു.
സ്റ്റേറ്റ് ഡിപ്പാർട്ട്മെന്റിന്റെ നേരിട്ടുള്ള മേൽനോട്ടത്തിൽ ഇതുവരെ ഇരുപതിലധികം ചാർട്ടർ വിമാന സർവീസുകൾ സംഘടിപ്പിച്ചിട്ടുണ്ട്. ഇതുവഴി അയ്യായിരത്തിലധികം ആളുകളെ നേരിട്ട് ഒഴിപ്പിക്കാൻ സാധിച്ചു. മേഖലയിൽ വാണിജ്യ വിമാന സർവീസുകൾ ക്രമേണ സാധാരണ നിലയിലേക്ക് മടങ്ങിയെത്തുന്നുണ്ടെങ്കിലും സുരക്ഷാ സാഹചര്യം കണക്കിലെടുത്ത് സർക്കാർ ഒരുക്കിയ ചാർട്ടർ വിമാനങ്ങളും കരമാർഗ്ഗ യാത്രാ സൗകര്യങ്ങളും കൂടുതൽ വിപുലീകരിക്കാനാണ് ഭരണകൂടത്തിന്റെ തീരുമാനം. ഇതിനായി പ്രത്യേക ടാസ്ക് ഫോഴ്സ് 24 മണിക്കൂറും പ്രവർത്തിച്ചുവരുന്നതായും അധികൃതർ അറിയിച്ചു.
ഒമാൻ, കുവൈത്ത്, ബഹ്റൈൻ, യുഎഇ, ഖത്തർ, സൗദി അറേബ്യ, ഇസ്രായേൽ എന്നീ രാജ്യങ്ങളിലുള്ള അമേരിക്കൻ പൗരന്മാരോട് യാത്രാ സഹായത്തിനായി ‘ക്രൈസിസ് ഇൻടേക്ക് ഫോം’ പൂരിപ്പിക്കണമെന്ന് അധികൃതർ നിർദേശിച്ചിട്ടുണ്ട്. ഇതിനോടകം 19,000ത്തിലധികം പേർക്ക് ടാസ്ക് ഫോഴ്സ് സുരക്ഷാ നിർദേശങ്ങളും യാത്രാ സഹായവും നൽകിയിട്ടുണ്ട്. എന്നാൽ സഹായം അഭ്യർഥിച്ചവരിൽ പകുതിയോളം പേർ സർക്കാർ ഒരുക്കിയ യാത്രാ സൗകര്യങ്ങൾ ഉപയോഗിക്കാത്തതും ശ്രദ്ധേയമാണ്. പലരും നിലവിലുള്ള രാജ്യങ്ങളിൽ തന്നെ തുടരുകയോ സ്വന്തം ക്രമീകരണങ്ങൾ ഉപയോഗിച്ച് യാത്ര ചെയ്യുകയോ ചെയ്യുന്നതായാണ് വിവരം.
മിഡിൽ ഈസ്റ്റിൽ നിന്ന് മടങ്ങാൻ ആഗ്രഹിക്കുന്ന ഏതൊരു അമേരിക്കൻ പൗരനെയും സഹായിക്കാൻ സ്റ്റേറ്റ് ഡിപ്പാർട്ട്മെന്റ് സന്നദ്ധമാണെന്ന് അധികൃതർ അറിയിച്ചു. അടിയന്തര സഹായം ആവശ്യമുള്ളവർക്ക് +1-202-501-4444 എന്ന നമ്പറിൽ ഏത് സമയത്തും സ്റ്റേറ്റ് ഡിപ്പാർട്ട്മെന്റുമായി ബന്ധപ്പെടാമെന്നും പൗരന്മാരുടെ സുരക്ഷ ഉറപ്പാക്കാൻ എല്ലാ നയതന്ത്ര-സാങ്കേതിക മാർഗ്ഗങ്ങളും വിനിയോഗിക്കുമെന്നും ഡിലൻ ജോൺസൺ വ്യക്തമാക്കി.
