ലോസ് ഏഞ്ചൽസിൽ വിദ്യാഭ്യാസ മേഖല സ്തംഭനത്തിലേക്ക്; കൂറ്റൻ പണിമുടക്കിന് അധ്യാപകരും ജീവനക്കാരും.

ലോസ് ഏഞ്ചൽസ്: ശമ്പള വർദ്ധനവും മെച്ചപ്പെട്ട സേവന വ്യവസ്ഥകളും ആവശ്യപ്പെട്ട് ലോസ് ഏഞ്ചൽസിലെ പൊതുവിദ്യാലയങ്ങളിൽ വൻ പണിമുടക്കിന് ഒരുക്കം. അധ്യാപകർ, പ്രിൻസിപ്പൽമാർ, മറ്റ് ജീവനക്കാർ എന്നിവരുൾപ്പെടെ ഏകദേശം 70,000 പേർ അടുത്ത ആഴ്ച ജോലി ബഹിഷ്കരിക്കും. ഇതോടെ അഞ്ചര ലക്ഷത്തോളം വിദ്യാർത്ഥികളുടെ പഠനം തടസ്സപ്പെടും.

ഏപ്രിൽ 14-നകം ധാരണയിലെത്തിയില്ലെങ്കിൽ സമരം തുടങ്ങാനാണ് യൂണിയനുകളുടെ തീരുമാനം. 17 ശതമാനം ശമ്പള വർദ്ധനവ് അധ്യാപകർ ആവശ്യപ്പെടുമ്പോൾ 8 ശതമാനം മാത്രമേ നൽകാനാകൂ എന്ന നിലപാടിലാണ് അധികൃതർ. സമരം നടന്നാൽ കുട്ടികൾക്ക് ഭക്ഷണം നൽകുന്നതിനും മറ്റുമായി പ്രത്യേക ക്രമീകരണങ്ങൾ ഏർപ്പെടുത്തുമെന്ന് സ്കൂൾ ഡിസ്ട്രിക്റ്റ് അറിയിച്ചു. ഏഴ് വർഷത്തിനിടെ ലോസ് ഏഞ്ചൽസിൽ നടക്കുന്ന മൂന്നാമത്തെ വലിയ സമരമായിരിക്കും ഇത്.