ആദ്യ മണിക്കൂറില് യുഡിഎഫ് മുന്നേറ്റം; ഒന്പത് മന്ത്രിമാര് പിന്നില്
നിയമസഭാ തിരഞ്ഞെടുപ്പിന്റെ വോട്ടെണ്ണല് ആദ്യ മണിക്കൂര് പിന്നിടുമ്പോള് സംസ്ഥാനത്ത് യുഡിഎഫ് വ്യക്തമായ മുന്നേറ്റം തുടരുന്നു. കേവലഭൂരിപക്ഷത്തിന് ആവശ്യമായ സീറ്റുകളില് ലീഡ് ഉയര്ത്തിയ യുഡിഎഫ് 83 മണ്ഡലങ്ങളില് മുന്നിലാണ്. എല്ഡിഎഫ് 52 സീറ്റുകളിലും എന്ഡിഎ അഞ്ച് മണ്ഡലങ്ങളിലും ലീഡ് നിലനിര്ത്തുന്നു.
എല്ഡിഎഫ് നിരയില് ഒന്പത് മന്ത്രിമാര് പിന്നിലാണെന്നത് ശ്രദ്ധേയമാണ്. ഇടുക്കിയില് റോഷി അഗസ്റ്റിന്, ഏറ്റുമാനൂരില് വി.എന്. വാസവന്, ഇരിങ്ങാലക്കുടയില് ആര്. ബിന്ദു, കൊട്ടാരക്കരയില് കെ.ബി. ഗണേഷ് കുമാര്, കളമശേരിയില് പി. രാജീവ്, മാനന്തവാടിയില് ഒ.ആര്. കേളു, നേമത്ത് വി. ശിവന്കുട്ടി, ആറന്മുളയില് വീണ ജോര്ജ്, താനൂരില് വി. അബ്ദുല് റഹ്മാന് എന്നിവര് പിന്നിലാണ്.
പേരാമ്പ്രയില് എല്ഡിഎഫ് കണ്വീനര് ടി.പി. രാമകൃഷ്ണനെതിരെ യുഡിഎഫ് സ്ഥാനാര്ഥി ഫാത്തിമ തഹിലിയ ലീഡ് നേടിയിട്ടുണ്ട്. മണലൂരില് ടി.എന്. പ്രതാപന്, കുന്നത്തൂരില് ഉല്ലാസ് കോവൂര്, ചവറയില് ഷിബു ബേബി ജോണ്, വട്ടിയൂര്ക്കാവില് കെ. മുരളീധരന് എന്നിവര് മുന്നിലാണ്.
വോട്ടെണ്ണല് പുരോഗമിക്കുന്നതിനാല് ലീഡ് നിലകളില് മാറ്റമുണ്ടാകാനിടയുണ്ടെന്നും അന്തിമഫലത്തിനായി രാഷ്ട്രീയ രംഗം ഉറ്റുനോക്കുകയാണെന്നും വിലയിരുത്തല്.
