ട്രംപ് താരിഫ് നയം പ്രതിസന്ധിയിൽ: യുഎസ് സുപ്രീം കോടതി വിധി ഇന്ത്യയ്ക്ക് ഗുണകരമാകുമോ?
വാഷിങ്ടൺ : ട്രംപ് ഭരണകൂടം നടപ്പാക്കിയ താരിഫ് നയത്തിന് യുഎസ് സുപ്രീം കോടതി തിരിച്ചടി നൽകിയാൽ, രാജ്യത്തിന്റെ ഖജനാവിന് വലിയ നഷ്ടം സംഭവിക്കുമെന്ന സൂചനയാണ് പുറത്ത് വരുന്നത്. ഏകദേശം പകുതിയോളം താരിഫുകൾ തിരികെ നൽകേണ്ടിവരുമെന്ന മുന്നറിയിപ്പാണ് യുഎസ് ട്രഷറി സെക്രട്ടറി സ്കോട്ട് ബെസ്സെന്റ് നൽകിയിരിക്കുന്നത്.
യുഎസിന്റെ താരിഫ് നയം ഇന്ത്യയിലെ ചില പ്രധാന കയറ്റുമതി മേഖലകളെ നേരിട്ട് ബാധിച്ചിരുന്നു. പ്രത്യേകിച്ച് ടെക്സ്റ്റൈൽസ്, തുകൽ ഉൽപ്പന്നങ്ങൾ, രത്നങ്ങൾ, ആഭരണങ്ങൾ തുടങ്ങിയ മേഖലകളിൽ താരിഫ് വർധനവ് വലിയ പ്രതിസന്ധി സൃഷ്ടിച്ചു. സുപ്രീം കോടതിയുടെ വിധി താരിഫ് പിൻവലിക്കുന്നതിലേക്ക് നയിക്കുകയാണെങ്കിൽ, ഇന്ത്യൻ കയറ്റുമതിക്ക് വലിയ ആശ്വാസമാകുമെന്നാണ് പ്രതീക്ഷ.
അതേസമയം, താരിഫ് നയങ്ങളിലെ അനിശ്ചിതത്വം നിലനിൽക്കുന്നതിനാൽ ദീർഘകാലാടിസ്ഥാനത്തിൽ ഇന്ത്യയ്ക്ക് എത്രത്തോളം ഗുണകരമാകുമെന്നത് വ്യക്തമല്ല. യുഎസ് ഭരണകൂടം മറ്റ് നിയമപരമായ വഴികളിലൂടെ താരിഫുകൾ തുടരാൻ സാധ്യതയുണ്ടെന്നും വിദഗ്ദ്ധർ വിലയിരുത്തുന്നു.
ട്രംപ് ഭരണകൂടം റഷ്യൻ എണ്ണ ഇറക്കുമതി വിഷയത്തിൽ ഇന്ത്യയ്ക്കെതിരെ ഉയർത്തിയ താരിഫുകൾ, ഇന്ത്യൻ കയറ്റുമതിക്ക് മുമ്പേ തന്നെ വലിയ തിരിച്ചടിയായിരുന്നുവെന്നത് വ്യവസായലോകം ഓർമ്മിപ്പിക്കുന്നു. ഈ സാഹചര്യത്തിൽ സുപ്രീം കോടതിയുടെ അനുകൂല വിധി ഇന്ത്യൻ വ്യാപാരത്തിന് വലിയൊരു വഴിത്തിരിവാകുമെന്ന പ്രതീക്ഷയിലാണ് വ്യവസായ സമൂഹം.
