പെരുന്നാൾ ദിനത്തിൽ ഉമ്മയ്ക്കരികിലേക്ക് അബ്ദുൾ റഹീം, രണ്ട് പതിറ്റാണ്ടിൻ്റെ കാത്തിരിപ്പിന് വിരാമം.

സൗദി അറേബ്യയിൽ വധശിക്ഷയ്ക്ക് വിധിക്കപ്പെട്ട് രണ്ട് പതിറ്റാണ്ടോളം ജയിലിൽ കഴിഞ്ഞ കോഴിക്കോട് കോടമ്പുഴ സ്വദേശി അബ്ദുൽ റഹീം ഒടുവിൽ ജയിൽ മോചിതനായി നാട്ടിലെത്തി. വലിയ പെരുന്നാൾ ദിനമായ ഇന്ന് രാവിലെ കരിപ്പൂർ അന്താരാഷ്ട്ര വിമാനത്താവളത്തിലാണ് അദ്ദേഹം വിമാനമിറങ്ങിയത്.

ഇരുപത് വർഷത്തെ നീണ്ട കാത്തിരിപ്പിന് വിരാമമിട്ട് നാട്ടിലെത്തിയ റഹീമിനെ സ്വീകരിക്കാൻ ബന്ധുക്കളും സുഹൃത്തുക്കളും ഉൾപ്പെടെ വൻ ജനക്കൂട്ടമാണ് വിമാനത്താവളത്തിൽ തടിച്ചുകൂടിയത്. നിറകണ്ണുകളോടെയാണ് റഹീം ടെർമിനലിൽ നിന്ന് പുറത്തേക്കിറങ്ങിയത്. എല്ലാവർക്കും നന്ദിയുണ്ടെന്ന് അദ്ദേഹം പ്രതികരിച്ചു.

2006-ൽ ഹൗസ് ഡ്രൈവർ ജോലിക്കായി സൗദിയിലെത്തിയ അബ്ദുൽ റഹീം, സ്പോൺസറുടെ ഭിന്നശേഷിക്കാരനായ മകൻ മരിച്ച സംഭവത്തിലാണ് ജയിലിലായത്. കുട്ടിയുടെ മരണത്തിൽ മനഃപൂർവമല്ലാത്ത കൈപ്പിഴയാണുണ്ടായതെന്ന് റഹീം വാദിച്ചെങ്കിലും സൗദി കോടതി അത് അംഗീകരിക്കാതെ വധശിക്ഷ വിധിക്കുകയായിരുന്നു.

വധശിക്ഷയിൽ നിന്ന് ഒഴിവാകാൻ കുട്ടിയുടെ കുടുംബം ആവശ്യപ്പെട്ട 1.5 കോടി സൗദി റിയാൽ (ഏകദേശം 34 കോടി രൂപ) ദയാധനമായി ലോകമെമ്പാടുമുള്ള മലയാളികൾ ഒത്തൊരുമിച്ച് സമാഹരിച്ച് നൽകിയിരുന്നു. ഇതോടെയാണ് കേസ് രാജ്യാന്തര ശ്രദ്ധ നേടിയത്.

ദയാധനം കൈമാറിയതിനെ തുടർന്ന് 2024 ജൂലൈയിൽ കോടതി വധശിക്ഷ റദ്ദാക്കിയെങ്കിലും സൗദി പൊതുനിയമപ്രകാരമുള്ള 20 വർഷത്തെ തടവുശിക്ഷ പൂർത്തിയാക്കേണ്ടതുണ്ടായിരുന്നു. ശിക്ഷാകാലാവധി കഴിഞ്ഞ വാരം അവസാനിച്ചതോടെ മോചനനടപടികൾ പൂർത്തിയാക്കി കഴിഞ്ഞ ചൊവ്വാഴ്ചയാണ് സൗദി അധികൃതർ എക്സിറ്റ് വിസ അനുവദിച്ചത്. തുടർന്ന് ഇമിഗ്രേഷൻ നടപടികൾ പൂർത്തിയാക്കി ഇന്ന് രാവിലെയാണ് റഹീം നാട്ടിലെത്തിയത്.

പെരുന്നാൾ ദിനത്തിൽ തന്നെ റഹീമിന്റെ മടങ്ങിവരവ് കുടുംബത്തിനും റഹീം നിയമസഹായ സമിതിക്കും പ്രവാസി മലയാളി സമൂഹത്തിനും ഇരട്ടി സന്തോഷമായി.

കോടമ്പുഴയിലെ പഴയ തറവാട്ടുവീടായ ‘സീനത്ത് മൻസിൽ’ലേക്കാണ് റഹീം എത്തിയത്. സഹോദരന്റെ വീട്ടിൽ താമസിച്ചുവരുന്ന മാതാവ് ഫാത്തിമയും ഇനി സീനത്ത് മൻസിലിലേക്ക് താമസം മാറും.

പരേതനായ മച്ചിലകത്ത് മുഹമ്മദ്കുട്ടിയുടെയും ഫാത്തിമയുടെയും ഇളയമകനായ അബ്ദുൽ റഹീം 2006 നവംബറിലാണ് 26-ാം വയസ്സിൽ ഹൗസ് ഡ്രൈവർ വിസയിൽ റിയാദിലെത്തിയത്. ഭാഗികമായി ചലനശേഷി നഷ്ടപ്പെട്ടിരുന്ന സ്പോൺസറുടെ 15 വയസ്സുള്ള മകനെ പരിചരിക്കലായിരുന്നു പ്രധാന ചുമതല.

സംഭവദിവസം കുട്ടിയുമായി കാറിൽ യാത്ര ചെയ്യുന്നതിനിടെ ട്രാഫിക് സിഗ്നൽ മറികടക്കാൻ കുട്ടി ആവശ്യപ്പെട്ടതായും ബഹളം വെച്ചതായും റഹീം പിന്നീട് വ്യക്തമാക്കിയിരുന്നു. കുട്ടിയെ ശാന്തനാക്കാൻ ശ്രമിക്കുന്നതിനിടെ അബദ്ധത്തിൽ കഴുത്തിലെ മെഡിക്കൽ ഉപകരണത്തിൽ കൈ തട്ടുകയും ഉപകരണം സ്ഥാനത്തുനിന്ന് മാറിപ്പോകുകയും ചെയ്തതോടെയാണ് കുട്ടി മരണപ്പെട്ടത്.

തുടർന്ന് കുട്ടിയുടെ കുടുംബത്തിന്റെ പരാതിയിൽ 2006 ഡിസംബർ 26-ന് റഹീം അറസ്റ്റിലായി. നീണ്ട നിയമപോരാട്ടങ്ങൾക്കും ചർച്ചകൾക്കുമൊടുവിലാണ് മലയാളി സമൂഹത്തിന്റെ ഇടപെടലിലൂടെ ദയാധനം സമാഹരിച്ച് വധശിക്ഷ റദ്ദാക്കാൻ സാധിച്ചത്.