പാക്ക്–അഫ്ഗാൻ സമാധാന ചർച്ച തകർന്ന് പോയത് രഹസ്യ കരാറിന് പിന്നാലെ; ഇന്ത്യയെ കുറ്റപ്പെടുത്തി പാക്കിസ്ഥാൻ
തുർക്കിയുടെ മധ്യസ്ഥതയിൽ നടന്ന പാക്കിസ്ഥാനും അഫ്ഗാനിസ്ഥാനും തമ്മിലുള്ള സമാധാന ചർച്ചകൾ അവസാന നിമിഷം തകർന്നത് വലിയ രാഷ്ട്രീയ നീക്കങ്ങൾക്കിടയിലായിരുന്നുവെന്നാണ് റിപ്പോർട്ടുകൾ. ചർച്ച പരാജയപ്പെട്ടതിന് പിന്നിൽ ഇന്ത്യയുടെ ഇടപെടലാണെന്ന് പാക്കിസ്ഥാൻ ആരോപിച്ചപ്പോൾ, അഫ്ഗാൻ മാധ്യമങ്ങൾ പറയുന്നത് വേറെയാണ് — പാക്കിസ്ഥാൻ യുഎസുമായുള്ള രഹസ്യ കരാറാണ് ചർച്ച തകർക്കാൻ കാരണമായത്.
അഫ്ഗാൻ റിപ്പോർട്ടുകൾ പ്രകാരം, പാക്കിസ്ഥാന്റെ മണ്ണിൽ നിന്ന് യുഎസ് സൈന്യത്തിന് ഡ്രോൺ ആക്രമണങ്ങൾ നടത്താൻ അനുമതി നൽകിയ കരാറാണ് തർക്കത്തിന് കാരണം. ചർച്ചയ്ക്കിടെ അഫ്ഗാൻ പ്രതിനിധികൾ ഈ കരാർ അവസാനിപ്പിക്കണമെന്നും, വിദേശ ഡ്രോണുകൾക്ക് പാക്കിസ്ഥാൻ വ്യോമാതിർത്തി ഉപയോഗിക്കാൻ അനുവദിക്കരുതെന്നും ആവശ്യപ്പെട്ടു. അതേസമയം, അതിർത്തിക്കപ്പുറത്ത് പാക്കിസ്ഥാൻ വിരുദ്ധ ഭീകര ഗ്രൂപ്പുകൾ പ്രവർത്തിക്കുന്നത് തടയാമെന്നും അഫ്ഗാൻ ഉറപ്പ് നൽകി.
പാക്കിസ്ഥാൻ കരാർ യുഎസുമായുള്ളതാണെന്നും അത് ലംഘിക്കാൻ കഴിയില്ലെന്നും സമ്മതിച്ചുവെന്നതാണ് അഫ്ഗാൻ മാധ്യമങ്ങളുടെ വെളിപ്പെടുത്തൽ. ചർച്ച നടന്നു കൊണ്ടിരിക്കെ പാക്കിസ്ഥാനിലെ ഉന്നത നേതൃനിരയിൽ നിന്നുള്ള ഒരു ഫോൺ കോളിന് ശേഷം പാക്ക് പ്രതിനിധികളുടെ നിലപാട് പെട്ടെന്നു മാറിയതായും റിപ്പോർട്ടുകളിൽ പറയുന്നു. ഈ അപ്രതീക്ഷിത മാറ്റത്തിൽ തുർക്കിയിലെയും ഖത്തറിലെയും മധ്യസ്ഥർ പോലും അത്ഭുതപ്പെട്ടുവെന്നാണ് വിവരം.
ഡോണാൾഡ് ട്രംപ് അധികാരത്തിലെത്തിയതിനു ശേഷം പാക്കിസ്ഥാനും യുഎസും തമ്മിലുള്ള പ്രതിരോധ സഹകരണം ശക്തമായതായി സൂചനയുണ്ട്. പാക്ക് പ്രധാനമന്ത്രി ഷെഹബാസ് ഷെരീഫും സൈനിക മേധാവി അസിം മുനീരും അടുത്തിടെ വൈറ്റ് ഹൗസ് സന്ദർശിച്ചിരുന്നു. അതേസമയം, ട്രംപ് അഫ്ഗാൻ സർക്കാരിനോട് ബാഗ്രാം വ്യോമത്താവളം യുഎസിന് തിരികെ നൽകണമെന്ന് ആവശ്യപ്പെട്ടതായും റിപ്പോർട്ടുകളുണ്ട്.
ഇക്കഴിഞ്ഞ അതിർത്തി സംഘർഷത്തിൽ ഇരുവിഭാഗത്തും നിരവധി സൈനികർ കൊല്ലപ്പെട്ട സാഹചര്യത്തിലാണ് ഈ സമാധാന ചർച്ച നടന്നത്. എന്നാൽ, പാക്കിസ്ഥാന്റെ രഹസ്യ കരാറും അതിന് പിന്നാലെയുള്ള നിലപാട് മാറ്റവും ചർച്ച പൂർണ്ണമായും തകർത്തുവെന്നതാണ് ഇപ്പോഴത്തെ വിലയിരുത്തൽ.
