‘അന്യായം’; ഇന്ത്യ തീരുവ കുറയ്ക്കണം; ട്രംപിനോട് ആവശ്യമുന്നയിച്ച് റിപ്പബ്ലിക്കൻ സെനറ്റർമാർ.
വാഷിംഗ്ടൺ: ഇന്ത്യയുമായുള്ള വ്യാപാര ചർച്ചകൾ പുരോഗമിക്കുന്നതിനിടെ, ഇന്ത്യ അമേരിക്കൻ പയർവർഗ്ഗങ്ങളുടെ ഇറക്കുമതിയിൽ ചുമത്തുന്ന ഉയർന്ന തീരുവ കുറയ്ക്കണമെന്ന് ആവശ്യപ്പെടാൻ പ്രസിഡൻ്റ് ഡോണൾഡ് ട്രംപിനോട് റിപ്പബ്ലിക്കൻ സെനറ്റർമാർ കത്തയച്ചു. മൊണ്ടാനയിൽ നിന്നുള്ള സ്റ്റീവ് ഡെയ്ൻസ്, നോർത്ത് ഡക്കോട്ടയിൽ നിന്നുള്ള കെവിൻ ക്രാമർ എന്നീ സെനറ്റർമാരാണ് ട്രംപിനോട് ഇക്കാര്യം ആവശ്യപ്പെട്ടത്.
അമേരിക്കയിൽ നിന്നുള്ള പയർവർഗ്ഗങ്ങൾക്ക്, പ്രത്യേകിച്ച് മഞ്ഞ പയർ (യെല്ലോ പീസ്) ഇറക്കുമതിയിൽ ഇന്ത്യ നിലവിൽ ചുമത്തുന്ന 30 ശതമാനം തീരുവ ‘അന്യായമാണെന്ന്’ കത്തിൽ ചൂണ്ടിക്കാട്ടുന്നു. 2025 നവംബർ 1 മുതൽ പ്രാബല്യത്തിൽ വന്ന ഈ താരിഫ് അമേരിക്കൻ കർഷകരെ പ്രതികൂലമായി ബാധിക്കുന്നതായും സെനറ്റർമാർ വ്യക്തമാക്കി.
പയർവർഗ്ഗ ഉത്പാദനത്തിൽ അമേരിക്കയിൽ മുൻനിരയിൽ നിൽക്കുന്ന സംസ്ഥാനങ്ങളാണ് മൊണ്ടാനയും നോർത്ത് ഡക്കോട്ടയും. ഇന്ത്യയുടെ ഉയർന്ന തീരുവ കാരണം ഈ സംസ്ഥാനങ്ങളിലെ കർഷകർക്ക് മറ്റ് രാജ്യങ്ങളിലെ ഉത്പാദകരുമായി മത്സരിക്കാൻ കഴിയുന്നില്ലെന്നും കത്തിൽ പറയുന്നു. ഇന്ത്യൻ വിപണിയിൽ അമേരിക്കൻ കർഷകർക്ക് മികച്ച പ്രവേശനം ഉറപ്പാക്കുന്നതിനായി ഇന്ത്യയുമായുള്ള വ്യാപാര ചർച്ചകളിൽ അനുകൂല വ്യവസ്ഥകൾ ഉൾപ്പെടുത്തണമെന്ന് സെനറ്റർമാർ ട്രംപിനോട് ആവശ്യപ്പെട്ടു.
ലോക രാജ്യങ്ങളോട് തീരുവ കുറയ്ക്കണമെന്ന് അമേരിക്ക ശക്തമായി ആവശ്യപ്പെടുന്ന സാഹചര്യത്തിലാണ് ഇന്ത്യയോട് തീരുവ കുറയ്ക്കാൻ സമ്മർദ്ദം ചെലുത്തണമെന്ന ആവശ്യം ഉയർന്നിരിക്കുന്നത്. ലോകത്തിലെ ഏറ്റവും വലിയ പയർവർഗ്ഗ ഉപഭോക്താക്കളിൽ ഒന്നായ ഇന്ത്യ ആഗോള ഉപഭോഗത്തിന്റെ ഏകദേശം 27 ശതമാനവും കൈവശം വയ്ക്കുന്നുവെന്നതും കത്തിൽ ചൂണ്ടിക്കാട്ടുന്നു. ഇന്ത്യ–അമേരിക്ക ഉഭയകക്ഷി വ്യാപാര കരാറുകൾ സജീവമായി ചർച്ചയിലിരിക്കുന്ന പശ്ചാത്തലത്തിലാണ് സെനറ്റർമാരുടെ ഈ നീക്കം.
