ഭരണവിരുദ്ധ തരംഗം ശക്തം; കേരളം, തമിഴ്നാട്, ബംഗാളില് ഭരിച്ചവര്ക്ക് തിരിച്ചടി
ന്യൂഡല്ഹി: വിവിധ സംസ്ഥാനങ്ങളിലെ നിയമസഭാ തിരഞ്ഞെടുപ്പുകളുടെ വോട്ടെണ്ണല് പുരോഗമിക്കുമ്പോള് ഭരണവിരുദ്ധ തരംഗം ശക്തമായി പ്രകടമാകുന്നതായി പ്രാരംഭ ഫലസൂചനകള് വ്യക്തമാക്കുന്നു. കേരളം, തമിഴ്നാട്, പശ്ചിമ ബംഗാള് എന്നിവിടങ്ങളില് ഭരിച്ച പാര്ട്ടികള്ക്ക് തിരിച്ചടിയുണ്ടാകുന്ന പ്രവണതയാണ് കാണുന്നത്.
കേരളത്തില് ഭരണകക്ഷിയായ എല്ഡിഎഫിന്റെ ശക്തമായ കോട്ടകളില്പോലും യുഡിഎഫ് മുന്നേറ്റം നടത്തുന്നതാണ് തുടക്കത്തിലെ ചിത്രം. മുഖ്യമന്ത്രി പിണറായി വിജയന് ഉള്പ്പെടെ ചില പ്രമുഖര് പിന്നിലാണെന്നത് ശ്രദ്ധേയമാണ്. എല്ഡിഎഫ് നിരയിലെ ഒന്പത് മന്ത്രിമാര് വരെ പിന്നിലായതും രാഷ്ട്രീയപരമായി വലിയ സൂചനയായി വിലയിരുത്തപ്പെടുന്നു.
തമിഴ്നാട്ടില് ഭരണകക്ഷിയായ ഡിഎംകെ നയിക്കുന്ന മുന്നണി മൂന്നാം സ്ഥാനത്തേക്ക് പിന്തള്ളപ്പെട്ടിരിക്കുകയാണ്. ആദ്യമായി തെരഞ്ഞെടുപ്പില് മത്സരിക്കുന്ന നടന് വിജയ് നയിക്കുന്ന തമിഴക വെട്രി കഴകം (ടിവികെ) മുന്നണിയാണ് ഏറ്റവും കൂടുതല് സീറ്റുകളില് ലീഡ് നേടുന്നത്. നിലവിലെ പ്രവണതകള് പ്രകാരം ഏകദേശം 100 സീറ്റുകളില് ടിവികെ മുന്നിലാണ്. എഐഡിഎംകെ നയിക്കുന്ന മുന്നണി 69 സീറ്റുകളില് രണ്ടാം സ്ഥാനത്തും ഡിഎംകെ 46 സീറ്റുകളിലേക്ക് പിന്തള്ളപ്പെട്ടിരിക്കുകയാണ്. മുഖ്യമന്ത്രി എം.കെ. സ്റ്റാലിന് ഉള്പ്പെടെ ചില പ്രമുഖര് പിന്നിലാണെന്നതും ശ്രദ്ധേയമാണ്.
പശ്ചിമ ബംഗാളിലും ഭരണമാറ്റത്തിന്റെ സൂചനകള് ശക്തമാകുന്നു. ബിജെപിയും തൃണമൂല് കോണ്ഗ്രസ് തമ്മിലുള്ള നേരിട്ടുള്ള പോരാട്ടത്തില് ബിജെപി മുന്നേറ്റം കൈവരിച്ചിരിക്കുകയാണ്. നിലവിലെ കണക്കുകള് പ്രകാരം ബിജെപി 152 സീറ്റുകളില് ലീഡ് നേടുമ്പോള് തൃണമൂല് കോണ്ഗ്രസ് 107 സീറ്റുകളില് മുന്നിലാണ്. വോട്ടെണ്ണലിന്റെ തുടക്കത്തില് മുഖ്യമന്ത്രി മമതാ ബാനര്ജി രണ്ടാംസ്ഥാനത്തേക്ക് പിന്തള്ളപ്പെട്ടതും ശ്രദ്ധേയമാണ്.
വോട്ടെണ്ണല് തുടരുന്നതിനാല് ലീഡ് നിലകളില് മാറ്റമുണ്ടാകാന് സാധ്യതയുണ്ടെങ്കിലും, പ്രാരംഭ പ്രവണതകള് ഭരണമാറ്റ സാധ്യതകളിലേക്ക് വിരല് ചൂണ്ടുന്നതായി രാഷ്ട്രീയ നിരീക്ഷകര് വിലയിരുത്തുന്നു.
