യു.എസ് സിനിമ വ്യവസായം തകര്ച്ചയിലേക്ക് നീങ്ങുന്ന പശ്ചാത്തലത്തില്, വിദേശ സിനിമകള്ക്ക് 100% താരിഫ് ചുമത്താനുള്ള നടപടിക്ക് തുടക്കംകുറിച്ച് പ്രസിഡന്റ് ഡോണള്ഡ് ട്രംപ്. Truth Social-ലൂടെ നടത്തിയ പ്രഖ്യാപനത്തിലാണ് ട്രംപ് ഈ തീരുമാനത്തെക്കുറിച്ച് വെളിപ്പെടുത്തിയത്.
വിദേശരാജ്യങ്ങളില് നിര്മിക്കുന്ന ഏതൊരു സിനിമക്കും അമേരിക്കയിലെത്തുമ്പോള് നൂറ് ശതമാനം താരിഫ് ബാധകമാകും. ഇതിനായി വാണിജ്യ വകുപ്പിനും യു.എസ് ട്രേഡ് പ്രതിനിധിക്കും അധികാരം നല്കിയതായി പ്രസിഡന്റ് വ്യക്തമാക്കി. താരിഫ് എങ്ങനെ പ്രയോഗിക്കുമെന്ന് വ്യക്തമല്ലെങ്കിലും, നടപടികള് ഉടന് ആരംഭിക്കുമെന്ന് സൂചന നല്കി.
ചലച്ചിത്ര നിര്മാതാക്കളെയും സ്റ്റുഡിയോകളെയും അമേരിക്കയില് നിന്ന് അകറ്റാനുള്ള ശ്രമമാണ് മറ്റ് രാജ്യങ്ങള് നടത്തുന്നതെന്നും, ഇവ നല്കുന്ന ആനുകൂല്യങ്ങള് അമേരിക്കയ്ക്ക് ഒരു ദേശീയ സുരക്ഷാ ഭീഷണിയാണെന്നും ട്രംപ് ആരോപിച്ചു. ഹോളിവുഡും മറ്റ് യു.എസ് മേഖലകളും തകര്ന്ന് പോകുന്നതിന് പിന്നില് മറ്റ് രാജ്യങ്ങളുടെ സംയോജിത തന്ത്രമുണ്ടെന്ന് അദ്ദേഹം പറഞ്ഞു.
ഇന്ത്യയിലെ മലയാളം, തെലുങ്ക്, ഹിന്ദി ഉള്പ്പെടെയുള്ള നിരവധി സിനിമകള് യുഎസില് പ്രദര്ശനത്തിന് എത്താറുണ്ട്. പുതിയ നടപടിയിലൂടെ ഈ മേഖലയും ബാധിക്കപ്പെടാന് സാധ്യതയുണ്ട്. ടെലിവിഷന് പരമ്പരകള് സംബന്ധിച്ച പരാമര്ശം ട്രംപിന്റെ പ്രസ്താവനയില് ഉണ്ടായിരുന്നില്ലെങ്കിലും, ഈ മേഖലയാണ് ഇപ്പോള് ഏറ്റവും കൂടുതല് പ്രചാരവും ലാഭവും നേടുന്നത്.
ഈ തീരുമാനത്തിന് അന്താരാഷ്ട്ര തലത്തില് വലിയ പ്രതിഫലനങ്ങളുണ്ടാകുമെന്നതാണ് കാഴ്ചപ്പാടുകള്.
