വെസ്റ്റ് ചെസ്റ്റർ കൗണ്ടി ലെജിസ്ലേറ്ററായി മലയാളി ആനന്ദ് നമ്പ്യാർ

ന്യൂയോർക്ക്: അമേരിക്കയിലെ പ്രമുഖ കൗണ്ടികളിലൊന്നായ വെസ്റ്റ് ചെസ്റ്റർ കൗണ്ടിയിൽ മലയാളിയായ ആനന്ദ് നമ്പ്യാർ ചരിത്രവിജയം നേടി. ഡിസ്ട്രിക്ട് ഏഴിൽ നടന്ന തിരഞ്ഞെടുപ്പിൽ അദ്ദേഹം 2264 വോട്ടുകൾ നേടി (65 ശതമാനം). എതിരാളിയായ കർട്ട് വാൻ കുളർക്ക് 1214 വോട്ടുകൾ (35 ശതമാനം) ലഭിച്ചു. വെസ്റ്റ് ചെസ്റ്റർ കൗണ്ടി ലെജിസ്ലേറ്ററായി തിരഞ്ഞെടുക്കപ്പെടുന്ന ആദ്യ ഇന്ത്യാക്കാരനാണ് ആനന്ദ് നമ്പ്യാർ.

ഡെമോക്രാറ്റിക് പാർട്ടിയുടെ പിന്തുണയോടെ മത്സരിച്ച നമ്പ്യാർക്ക് പ്രൈമറി തെരഞ്ഞെടുപ്പിന്റെ ആവശ്യമുണ്ടായിരുന്നില്ല. ലാർച്ച്മോണ്ട്, മാമറോനെക്ക്, റൈ, റൈ നെക്ക്, ഹാരിസൺ എന്നീ ടൗണുകൾ ഉൾപ്പെടുന്ന ഡിസ്ട്രിക്ട് ഏഴിലാണ് അദ്ദേഹത്തിന്റെ വിജയം.

കേരളത്തിൽ ജനിച്ചും ബാംഗളൂരിൽ വളർന്നുമാണ് ആനന്ദ് നമ്പ്യാർ. കന്നഡ ഭാഷയിലും നൈപുണ്യമുണ്ട്. തൊഴിൽജീവിതം ഡൽഹിയിൽ ആരംഭിച്ച അദ്ദേഹം പിന്നീട് കാനഡ വഴി അമേരിക്കയിലെത്തി. ഇപ്പോൾ മാമറോനെക്ക് ടൗൺ കൗൺസിൽ അംഗമാണ്. മുൻപ് സ്കൂൾ ബോർഡ് അംഗമായും സേവനമനുഷ്ഠിച്ചിട്ടുണ്ട്. ഒഴിവ് വന്നപ്പോൾ റൈ സിറ്റി ഡെമോക്രാറ്റിക് കമ്മിറ്റി ഏകകണ്ഠമായി അദ്ദേഹത്തെ സ്ഥാനാർത്ഥിയായി തിരഞ്ഞെടുത്തു.

12 പേറ്റന്റുകളുടെ ഉടമസ്ഥനായ അദ്ദേഹം വ്യത്യസ്തമായ ചിന്താശേഷിയും നവോന്മേഷവുമുള്ള വ്യക്തിത്വമാണ്. 55 കാരനായ നമ്പ്യാർ ഇന്ത്യൻ അമേരിക്കൻ, ദക്ഷിണേഷ്യൻ സമൂഹങ്ങളുടെ ശക്തമായ ശബ്ദമാണ്. വെസ്റ്റ് ചെസ്റ്ററിൽ ദീപാവലി സ്കൂൾ അവധി ദിവസമായി പ്രഖ്യാപിക്കുന്നതിനായുള്ള പ്രവർത്തനങ്ങളിൽ അദ്ദേഹംയും ഭാര്യയും പ്രധാന പങ്കുവഹിച്ചു.

രണ്ട് പതിറ്റാണ്ടിലേറെയായി ലാർച്ച്മോണ്ടിൽ താമസിക്കുന്ന നമ്പ്യാർ, അമേരിക്കൻ എക്സ്പ്രസ്, മാസ്റ്റർകാർഡ്, സിൻക്രണി ഫിനാൻഷ്യൽ തുടങ്ങിയ പ്രമുഖ സ്ഥാപനങ്ങളിൽ സീനിയർ എക്സിക്യൂട്ടീവായി 25 വർഷത്തിലേറെ പ്രവർത്തിച്ചു. സമ്പദ്‌വ്യവസ്ഥയിലുള്ള ആഴത്തിലുള്ള പരിചയസമ്പത്തും പ്രശ്നപരിഹാരത്തിൽ ഉള്ള കഴിവും പൊതുസേവനത്തിന് അദ്ദേഹം പ്രയോജനപ്പെടുത്തുന്നു.

വെള്ളപ്പൊക്കം, ഭവന ലഭ്യത കുറവ്, സാമ്പത്തിക നിയന്ത്രണം എന്നിവയാണ് തന്റെ പ്രചാരണത്തിന്റെ പ്രധാന വിഷയങ്ങൾ. 2.5 ബില്യൺ ഡോളർ ബജറ്റ് കൈകാര്യം ചെയ്യുന്ന വെസ്റ്റ് ചെസ്റ്റർ കൗണ്ടിയുടെ വികസനത്തിൽ നിർണായക പങ്ക് വഹിക്കാമെന്ന് അദ്ദേഹം പറയുന്നു.

വെസ്റ്റ് ചെസ്റ്ററിലെ ഏകദേശം ഒരു മില്യൺ ജനങ്ങൾ നേരിടുന്ന വെല്ലുവിളികൾക്ക് ശക്തമായ നേതൃത്വമാണ് ആവശ്യമായതെന്ന് നമ്പ്യാർ ചൂണ്ടിക്കാട്ടുന്നു. സ്കൂൾ ബോർഡിലും ടൗൺ ബോർഡിലും സാമ്പത്തിക കാര്യങ്ങൾ മെച്ചപ്പെടുത്തിയത് തന്റെ നേട്ടങ്ങളായി അദ്ദേഹം ഓർക്കുന്നു.

മാനസികാരോഗ്യ സേവനങ്ങൾ, ഭാഷാ സഹായങ്ങൾ, വിവേചനത്തിനെതിരായ നടപടികൾ തുടങ്ങിയവയാണ് ഏഷ്യൻ അമേരിക്കൻ സമൂഹത്തിന്റെ പ്രധാന ആവശ്യങ്ങൾ. കൗണ്ടിയുടെ വിഭവങ്ങൾ ന്യായമായി ലഭ്യമാക്കാൻ അദ്ദേഹം പ്രതിജ്ഞാബദ്ധനാണ്.

2021ൽ കോർപ്പറേറ്റ് മേഖലയിലെ ജോലി വിടുകയും പൊതുസേവനത്തിന് പൂർണ്ണമായി സമർപ്പിക്കുകയും ചെയ്ത ആനന്ദ് നമ്പ്യാർ, ഭരണത്തിൽ സുതാര്യതയും ജനസഹകരണവും ഉറപ്പാക്കുമെന്ന് വാഗ്ദാനം ചെയ്യുന്നു. “ജനങ്ങൾ ശ്രദ്ധിക്കുമ്പോഴാണ് സർക്കാർ ഏറ്റവും നന്നായി പ്രവർത്തിക്കുന്നത്,” എന്ന് നമ്പ്യാർ പറഞ്ഞു. “വെസ്റ്റ് ചെസ്റ്ററിലെ ഓരോ നിവാസിയും കേൾക്കപ്പെടുകയും വിലമതിക്കപ്പെടുകയും വേണം.”

ഭാര്യ ഹേമ ഗുജറാത്തിയാണ്. മൂന്ന് മക്കൾ — കുമാർ, സച്ചിൻ, സിമ്രാൻ.