ഹെഡ്ലൈന്: അമേരിക്കൻ ആക്രമണത്തിന് നന്ദിയോടെ പ്രാർത്ഥന; ട്രംപിനും ഇസ്രായേൽ സൈന്യത്തിനും ആശംസയുമായി നെതന്യാഹു ദമ്പതികൾ
ടെൽ അവീവ്: ഇറാനിലെ ആണവ കേന്ദ്രങ്ങളിൽ അമേരിക്ക നടത്തിയ ആക്രമണത്തിനു നന്ദിയോടെ, അമേരിക്കൻ പ്രസിഡന്റ് ഡോണൾഡ് ട്രംപിന്റെയും ഇസ്രായേൽ പ്രതിരോധ സേനയുടെയും ക്ഷേമത്തിനായി പ്രത്യേക പ്രാർത്ഥന നടത്തി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും ഭാര്യ സാറയും. ജെറുസലേമിലെ ചരിത്രപ്രാധാന്യമുള്ള വെസ്റ്റേൺ വാളിലാണ് ദമ്പതികൾ പ്രാർത്ഥനക്ക് എത്തിയത്.
അമേരിക്ക നടത്തിയ സൈനിക നടപടികൾക്ക് പിന്തുണയും നന്ദിയും പ്രകടിപ്പിക്കുന്നതാണ് സന്ദർശനത്തിന്റെ പ്രധാന ലക്ഷ്യമായിരുന്നുവെന്ന് ഔദ്യോഗിക വൃത്തങ്ങൾ അറിയിച്ചു. “അത്ഭുതങ്ങൾക്ക് സർവ്വശക്തനോടു നന്ദി,” എന്ന് നെതന്യാഹു പ്രാർത്ഥനക്കിടെ പറഞ്ഞതായും അന്തർദേശീയ മാധ്യമങ്ങൾ റിപ്പോർട്ട് ചെയ്തു.
വെസ്റ്റേൺ വാൾ ഹെറിറ്റേജ് ഫൗണ്ടേഷൻ ഡയറക്ടർ മൊർദെഖായ് എലിയാവിന്റെയും പുരോഹിതന്റെയും സാന്നിധ്യത്തിലായിരുന്നു പ്രാർത്ഥനാ ചടങ്ങ്. ഞായറാഴ്ച വൈകുന്നേരത്തോടെയാണ് ചടങ്ങ് നടന്നത്.
ഫൊർദോ, നത്താൻസ്, ഇസ്ഫഹാൻ എന്നീ ഇറാനിലെ മൂന്ന് പ്രധാന ആണവകേന്ദ്രങ്ങളിലേക്കാണ് അമേരിക്കൻ സൈന്യം ബി-2 ബോംബർ ഉപയോഗിച്ച് ആക്രമണം നടത്തിയത്. ഓപ്പറേഷൻ മിഡ്നൈറ്റ് ഹാമർ എന്ന പേരിലാണ് സൈനിക നടപടികൾക്ക് അമേരിക്ക ഔദ്യോഗികമായി പേരിട്ടത്.
