അമേരിക്കയിൽ വീണ്ടും ഭൂചലനം: ന്യൂയോർക്ക്, ന്യൂ ജേഴ്സിയിൽ പ്രകമ്പനം
ന്യൂയോർക്ക്: അമേരിക്കയിൽ വീണ്ടും ഭൂചലനമുണ്ടായി. റിക്ടർ സ്കെയിലിൽ 2.7 തീവ്രതയുള്ളതാണ് ഈ ഭൂചലനം. ന്യൂ ജേഴ്സിയിലും ന്യൂയോർക്ക് നഗരത്തിലുമാണ് പ്രകമ്പനം അനുഭവപ്പെട്ടത്. മാൻഹാട്ടനിൽ നിന്ന് ഏകദേശം 20 മൈൽ അകലെയാണ് ഭൂചലനത്തിന്റെ കേന്ദ്രം എന്നാണു അമേരിക്കൻ ജിയോളജിക്കൽ സർവേ വിഭാഗം വ്യക്തമാക്കുന്നത്.
ഭൂചലനത്തെ തുടർന്ന് ആളപായമോ വൻ നാശനഷ്ടമോ ഉണ്ടായിട്ടില്ലെന്ന് റിപ്പോർട്ടുകളുണ്ട്. ഭൂചലനം സംഭവിച്ചത് പ്രാദേശിക സമയം ഓഗസ്റ്റ് 5-ാം തീയതി ഉച്ചയ്ക്ക് സമീപമായിരുന്നു.
ഇത് തുടരുന്ന പ്രകമ്പനങ്ങളിലേതാണ്. കഴിഞ്ഞ ആഴ്ചയും ജൂലൈ 22-നുമാണ് ഇതിനു മുമ്പ് ന്യൂ ജേഴ്സിക്ക് സമീപമുള്ള ഹസ്ബ്രൂക് ഹൈറ്റ്സിൽ ചെറിയ ഭൂചലനങ്ങൾ ഉണ്ടായത്. ജൂലൈ 22-ലെ ഭൂചലനത്തിന്റെ തീവ്രത 2 ആയിരുന്നെങ്കിൽ, പിന്നീട് ഉണ്ടായത് 3 തീവ്രതയുള്ളതായിരുന്നു.
തീവ്രത കുറഞ്ഞതാണെങ്കിലും ഈ പ്രദേശങ്ങളിൽ തുടർച്ചയായി ഭൂചലനങ്ങൾ അനുഭവപ്പെടുന്നത് ആശങ്കയ്ക്കിടയാകുകയാണ്.
