യുദ്ധവിരാമത്തിന് ട്രംപിന്റെ ‘മാസ്റ്റർ പ്ലാൻ’; യുക്രെയ്നിൽ കടുത്ത വിവാദം
ഹൂസ്റ്റൺ : റഷ്യ–യുക്രെയ്ൻ യുദ്ധം അവസാനിപ്പിക്കാൻ യുഎസ് പ്രസിഡന്റ് ഡോണൾഡ് ട്രംപ് മുന്നോട്ടുവച്ച 28 ഇന സമാധാന പദ്ധതി യുക്രെയ്നിൽ വലിയ ചർച്ചക്കും വിമർശനങ്ങൾക്കും വഴിതെളിച്ചിരിക്കുകയാണ്. ട്രംപിന്റെ നിർദേശങ്ങൾ യുക്രെയ്നെ സംബന്ധിച്ചിടത്തോളം കർശനമാണെന്നും അത് രാജ്യത്തിന്റെ പരമാധികാരത്തിനെതിരെയുള്ളതാണെന്നും യുക്രെയ്ൻ പ്രസിഡന്റ് വൊളോഡിമിർ സെലെൻസ്കി വ്യക്തമാക്കിയിട്ടുണ്ട്.
ട്രംപിന്റെ പദ്ധതിപ്രകാരം നിലവിൽ റഷ്യയുടെ നിയന്ത്രണത്തിലുള്ള ഡോൺബാസ്, ക്രൈമിയ തുടങ്ങിയ പ്രദേശങ്ങൾ റഷ്യയ്ക്ക് വിട്ടുകൊടുക്കണമെന്നതാണ് പ്രധാന വ്യവസ്ഥ. യുദ്ധം നടക്കുന്ന അതിർത്തികൾ അതേപടി അംഗീകരിക്കണമെന്നും, കുറഞ്ഞത് 20 വർഷത്തേക്ക് യുക്രെയ്ൻ നാറ്റോയിൽ ചേരില്ലെന്ന് ഉറപ്പുനൽകണമെന്നും ട്രംപ് ആവശ്യപ്പെടുന്നു. ഇപ്പോഴുള്ള യുദ്ധരേഖയോട് ചേർന്ന് 800 മൈൽ നീളത്തിൽ ഒരു സൈനികരഹിത മേഖല സൃഷ്ടിക്കാനും അതിന്റെ സുരക്ഷ ഏഷ്യൻ സേനകളല്ല, യൂറോപ്യൻ സേന ഏറ്റെടുക്കണമെന്നുമാണ് നിർദ്ദേശം. യുക്രെയ്ൻ സൈനികരുടെ എണ്ണം 8 ലക്ഷത്തിൽ നിന്ന് 6 ലക്ഷമായി കുറയ്ക്കണമെന്നും പദ്ധതി ആവശ്യപ്പെടുന്നു.
റഷ്യയ്ക്കെതിരായ സാമ്പത്തിക ഉപരോധങ്ങൾ പടിപടിയായി നീക്കം ചെയ്ത് അവരെ ആഗോള വിപണിയിലേക്ക് തിരികെ കൊണ്ടുവരാനും, യുക്രെയ്ൻ പുനർനിർമാണത്തിന് 100 ബില്യൺ ഡോളറിന്റെ ഫണ്ട് അനുവദിക്കാനുമാണ് നിർദേശം. റഷ്യയുടെ മരവിപ്പിച്ച സ്വത്തുക്കൾക്കും യൂറോപ്യൻ സഹായത്തിനുമാണ് ഈ തുക ലഭ്യമാക്കുന്നതെന്ന് വ്യക്തമാക്കുന്നു.
നിരീക്ഷകർ പദ്ധതിയെ യുക്രെയ്നെതിരായ വലിയ തിരിച്ചടിയായി വിലയിരുത്തുന്നു. രാജ്യത്തിന്റെ ഏകദേശം 20 ശതമാനത്തോളം വരുന്ന ഭൂമി കൈവിടേണ്ടി വരുന്നത് ഭാവിയിൽ റഷ്യക്ക് വീണ്ടും ആക്രമണം നടത്താനുള്ള ധൈര്യം നൽകുമെന്ന് അവർ ചൂണ്ടിക്കാട്ടുന്നു. നാറ്റോ അംഗത്വം നഷ്ടപ്പെടുന്നത് യുക്രെയ്നെ ഭാവിയിൽ കൂടുതൽ അസുരക്ഷിതമാക്കുമെന്നും വിലയിരുത്തപ്പെടുന്നു. എന്നാൽ യുദ്ധം ഉടൻ അവസാനിപ്പിക്കാനാവുന്നതും അമേരിക്കൻ നികുതിദായകരുടെ പണം സംരക്ഷിക്കാനാവുന്നതുമാണ് ഈ പദ്ധതിയുടെ ഗുണമെന്ന് ട്രംപ് അനുകൂലികൾ വാദിക്കുന്നു.
‘അമേരിക്ക ആദ്യം’ എന്ന തത്വം ആവർത്തിക്കുന്ന ട്രംപ്, യുക്രെയ്ൻ യുദ്ധത്തിന് അമേരിക്കയുടെ പണം ചെലവഴിക്കുന്നത് താൻ അംഗീകരിക്കില്ലെന്നും, കരാർ അംഗീകരിച്ചില്ലെങ്കിൽ സഹായം നിർത്തുമെന്നും മുന്നറിയിപ്പ് നൽകിയിട്ടുണ്ട്. യുക്രെയ്ൻ സമാധാനത്തിന് വഴങ്ങുന്നില്ലെന്നും ട്രംപ് വിമർശിച്ചു.
ട്രംപിന്റെ നിർദേശങ്ങളെ സെലെൻസ്കി കൂർമ്മമായി വിമർശിച്ചു. രാജ്യത്തിന്റെ ഒരു ഭാഗവും വിട്ടുകൊടുക്കുന്നൊരു കരാറിനും താൻ തയ്യാറല്ലെന്നും ഇത് യുക്രെയ്നിന്റെ ഭരണഘടനയ്ക്കും സ്വാതന്ത്ര്യത്തിനുമെതിരാണെന്നും അദ്ദേഹം വ്യക്തമാക്കി. സൈനികരുടെ എണ്ണം കുറയ്ക്കണമെന്ന നിർദ്ദേശം റഷ്യൻ ഭീഷണിയുടെ പശ്ചാത്തലത്തിൽ ആത്മഹത്യാപരമാണെന്നും സെലെൻസ്കി അഭിപ്രായപ്പെട്ടു. നാറ്റോയിൽ ചേരില്ലെന്ന് എഴുതി നൽകണമെന്ന ആവശ്യം രാജ്യത്തിന്റെ ഭാവി സുരക്ഷയെ തകർക്കുമെന്നും അദ്ദേഹം പറഞ്ഞു.
ട്രംപ് നൽകിയ നവംബർ 27-നുള്ള സമയപരിധി ‘അസാധ്യമായ തിരഞ്ഞെടുപ്പ്’ ആണെന്ന് സെലെൻസ്കി വിലയിരുത്തി. കരാർ അംഗീകരിച്ചാൽ രാജ്യം വിഭജിക്കപ്പെടും; നിരസിച്ചാൽ അമേരിക്കയുടെ സഹായം നഷ്ടപ്പെടുകയും യുദ്ധം തുടരാനാവാത്ത സാഹചര്യം ഉണ്ടാകുകയും ചെയ്യുമെന്ന ആശങ്കയിലാണ് അദ്ദേഹം.
അതേസമയം, പദ്ധതി പൂർണ്ണമായി തള്ളിക്കളയാതെ, നയതന്ത്ര ചർച്ചകളിലൂടെ വ്യവസ്ഥകൾ മാറ്റിക്കൊള്ളാനാണ് സെലെൻസ്കിയുടെ ശ്രമം. ട്രംപ് പിന്നീട് പറഞ്ഞ ‘ഇതൊരു അവസാന ഓഫർ അല്ല’ എന്ന നിലപാട് സാവധാനം ആശ്വാസം നൽകുന്നുവെങ്കിലും, അമേരിക്കയുമായുള്ള ബന്ധവും ദേശീയ സുരക്ഷയും കൂട്ടിച്ചേർന്ന ഒരു കടുത്ത സമ്മർദ്ദത്തിലൂടെ യുക്രെയ്ൻ ഇപ്പോൾ മുന്നേറുകയാണ്.
